E lei atoa se lua vaiaso talu ona faalauiloa le polokalame a leoleo o le Malu i ou Tuaoi i Vaitele-fou, ae ua molia ni alii se toatolu mai lea nofoaga i le fasioti tagata faamoemoeina.
Faaalia e le Komesina o Leoleo ma Falepuipui, Lilomaiava Fou Taioalo, o le afiafipo o le Aso Toonai atu i ona tua, poo le tea o le valu na logoina ai leoleo i le faalavelave.
E taunuu atu leoleo i le falemai ua maliu le alii talavou 19 tausaga na aafia le soifua i le faaoolima a le toatolu ua molia i le fasioti tagata faamoemoeina.
O se faanoanoaga lea i le Matagaluega o Leoleo ma Falepuipui i le taumafai e faatino le polokalame e galulue faatasi ai aiga uma e puipuia le saogalemu o o latou soifua ma meatotino mai solitulafono, ae ua faafeto‘ai le amataga o le polokalame i se faalavelave matuia.
Faaalia e le komesina o loo iai masalosaloga o se feeseeseaiga i le va o alii ua molia ma lē ua maliu na mafua ai le vevesi ma faaoolima ai loa i latou ua molia i lē ua maliu.
Fomai faapitoa e suesueina tino maliu
I se isi o lipoti mai leoleo, o loo faatali nei le taunuu mai o ni fomai faapitoa e sailia mafuaaga o maliu faapea fomai popoto e suesueina itutino o tagata, mo le silasila i se auivi o se tagata na maua i Faleasiu-uta i le vaiaso ua mavae.
E lē o iloa poo se alii poo se tamaitai e faasino i ai lea auivi, ma o le isi tulaga lea o le a agai i ai suesuega a fomai faapitoa. O loo iai nisi o lipoti o loo ta‘ua ai, o loo iai nisi o masaloga i se tasi o alii mai lea lava afioaaga na leiloa mai le tausaga talu ai, ma e lei toe maua lava, peitai e lei matuā faamaonia na lipoti. Peitai afai e moni na malosaga, e iai la nisi e ono agai i ai suesuega a leoleo, o i latou lava ia sa lipotia i le taimi na misi ai lea alii, sa iai se latou feeseeseaiga, ma taumafai e tulituliloa lenei alii seia oo ina leiloa mai le afioaga.E tasi se maliu i le pule i le ola mai le nuu o Solosolo lea e faapea o se tamaitai 14 tausaga le matua na maua e lona aiga ua maliu i se nofoaga e lē mamao ma le tunoa o lea aiga.
O se tamā 58 tausaga le matua o Fagaloa na maliu foi i le vaiaso ua mavae, ma na ta‘ua e le komesina, o lē ua maliu na alu e lafoai se meaola ua mate, ae fiu ai lo latou aiga e tatali e lei foi ane lava. Na faia sailiga ma maua ai lona tino maliu i gataifale o Fagaloa.
