O le talafaasolopito o soligatulafono o Samoa ua manino ai le tele o le suiga ua vaaia i le 20 tausaga ua tuanai. O le maliu ona o vevesi e tele ina na o le lua lava mafuaaga sa lipotia. Muamua o ni feeseeseaiga e tulai mai ona o le va o tagata o aiga poo tagata o nuu i fanua.
O feeseeseaiga i le va o ulugalii le isi mafuaaga lona lua o le tulai mai o solitulafono. E seāseā foi molimauina ni fasioti tagata faamoemoeina, e tele lava i le fasioti tagata pa‘ivalea.
O le vaitaimi lenei ua faaopoopo i ai ma le tagofia o le ava malosi. O se tasi o faalavelave na faaoolima ai se alii e suafa ia Tipasa Tauleoo o Faatoia ma Samatau i se isi alii o Auala, Asau ma Vailoa Faleata e suafa ia Mulivai Anetima, na toe laga ai loa e le afioga i le Faamasino o le Faamasinoga Maualuga, le Afioga Vui Clarence Nelson lenei mataupu ma lona finagalo, ua tatau lava ona toe iloilo lelei tulafono e aiaia ai le tagofia o le ava malosi.
Ta‘ua e Vui i le lauina o le iuga o Tauleoo ina ua faamaonia lona fasioti tagata pa‘ivalea, ua tele naua faalavelave ua tulai mai, ua mafua i le ava malosi.
O le mataupu lenei atonu o le alii lea na faaoolima e lei tagofia le ava malosi, ae o lē ua maliu o ia lea na faasuaava, ua soona lafo faamatalaga malolosi ma faatupu ai le ita i lē ua molia ma tulai mai ai loa le faaoogalima na iu ai ina maliu le alii lea na faasuaava.
O lē ua maliu e nonofo faatasi lava ma e aiga foi ma Tauleoo. O se alii e iai ni manaoga faapitoa e gūgū toe tutuli. Ae o le la nonofo faatasi ai, e tele lava ina malaga mai i Faatoia i Samatau i faaiuga o vaiaso ma agai i Samatau i le isi itu o le aiga.
O le tasi o faaiuga o le vaiaso na agai ai foi ae e lē iloa la e Tipasa ua faatau se fagu malosi o le ituaiga o le Niu Voka, o se fagu malosi e gaosi i Samoa, ma o le fagu aupito taugofie lea o loo iai pe a faatusatusa tau o fagu malosi o loo maua i le atunuu.
E oo atu i Samatau ua matuā faasuaava lē ua maliu ma na tulai mai ai loa se vevesi lea e ta‘ua e le Ofisa o leoleo, na soona malomaloā ai lē ua maliu, ae na ta‘ua e lē ua molia na matuā faateia lava ma o lona ita tele na faaoolima ai loa i lona tei lea.
O le tu‘i na tau tonu i le fofoga o lē ua maliu na palasi ma tau ai le ulu i se tasi o pou o le fale ma e talitonu le faamasinoga na mafua ai lava le maliu o lenei alii. O le aso 29 o Me o le tausaga na tea nei na tulai mai ai lea faalavelave, lea la faato‘ā folasia i luma o le Faamasinoga i le vaiaso ua tea atu.
“E lē o se mataupu muamua lea ua tulai mai e aafia ai le ava malosi, ma e fautuaina ai e le Faamasinoga le tatau ona toe iloilo ma teuteu lea tulafono. E foliga mai e na o le Loia Sili a le Malo o loo ia lagolagoina lea mataupu, ae o se fautuaga lena a le Faamaisnoga ona o le faatuputupulaia pea o lea faafitauli, ma ua tatou oo foi i le vaitau o Aso fiafia e tele ina aafia ai le ava malosi”, o le saunoaga lea a le Afioga Vui.
Na faaalia e le alii loia na tulai mo lē na molia, le Afioga Toleafoa Solomona Toailoa, o le ala lea o le faateia o lē ua molia na ia faaoo ai loa ni manu‘a i lē ua maliu e tusa ai o ni tu ma ni aga na ia faaalia a o iai tagata o lona aiga. E lē iloa e le alii ua molia sa inu mai i tua o le taavale le alii gūgū lea.
O le soligatulafono lenei e mafai ona soloatoa ai le tagata i le toese pe a faamaonia ona moliaga, peitai e iai nisi o itu lelei mo le alii o Tipasa e pei o lona vave ioeina o le moliaga faatasi ai o lea faato‘ā molia o ia i se soligatulafono ma ua faamaonia lona moliaga ma ua nofosala nei i le toese mo le umi e lua tausaga.