Mai i le toaono o tamā ma tina na faamamā toto ina ua faato‘ā faatu le Falemai faamamā toto i Motootua, i le tausaga e 2005, o lea ua togafitia nei se to‘a 72 i lenei lava gasegase i lenei tausaga.
Ua aofia ai tina ma tamā matutua, o le tupulaga talavou e oo lava i fanau laiti. O i latou ua gasegase fatuga‘o ma ua leai lava se isi togafitiga ua mafai i ai.
E matautia lea ituaiga numera pe a fuafua atu i le taimi na amata ai lea auaunaga, peitai na faaalia e le Minisita o le Soifua Maloloina le Afioga Tuitama Talalelei i lana tali fuaitau i le Palemene, e tele mamao lava le tupe na faaalu e tagata totogi lafoga e ave ai tagata i Niu Sila poo Amerika Samoa foi i tausaga ua mavae e faatino ai ia togafitiga.
I le to‘a 72 o loo togafitia nei ua alu ai le $4.5 (fa ma le afa) miliona tala (Samoa) – mo tagata e toalima e ave i fafo e alu ai lava le $1.5 (tasi ma le afa) i le $3miliona (tala) i o latou togafitiga.
O se faasao tele lea mo le Malo poo tagata totogi lafoga o Samoa.
O le faamalamalamaga a le Alii Minisita na ia ta‘ua ai o loo aofia ai i le to‘a 72 lea nisi o le atunuu ua faapea ona asiasi mai i atunuu i fafo.
O tagatanuu lava o Samoa o loo ua faamautu i atunuu mamao ae o loo agai mai i aiga i Samoa nei ma tapa ai lenei fesoasoani.
Ua ofo e le malo e totogi se vaega o togafitiga nei ina ia mafai ai e tagata o loo nonofo i Samoa nei ona totogi le faamamāina o le toto.
O se fesoasoani mai i le Soifua Maloloina i Singapore na mafai ai ona faatū se falemai faapenei i le atunuu.
O le fesoasoani a le Malo, o le fesoasoani a le tele o faalapotopotoga lotu ma isi lava faalapotopotoga tuma‘oti ua mafai ona faaauau ai togafitiga nei auā e taugata tele ae o loo maua mai foi se fesoasoani e ala i le Faalapotopotoga o le Soifua Maloloina o le Lalolagi i lenei lava nofoaga.
Faaalia e le Alii Minisita, e faaauau le popolega i le faatuputupulaia o tagata Samoa o le a aafia ai i lenei gasegase ma ua faapea ona agai le Matagaluega e saga faamalosia taumafaiga ina ia mafai ai ona faaitiitia lea numera e ala i faamalositino ia ua faagasolo i nuu.
O le faalauiloa atili o le tāua o taumafa paleni ma le taofia o le taumafa o tagata Samoa i taumafa lololo ma le suamalie, a o le oona foi. O lea foi ua amata faagasolo polokalame faalauiloa nei.
Ua amata galuega a le Falemai o Fatugao ina ia fausia se isi nofoaga faapea i le motu tele i Salafai ma o le tausaga nei lea ua fuafua e tatala ai.
Ua faia lea tulaga ina ia faafaigofie ai i le mamalu o le atunuu i lea foi itu o Samoa ona maua lea auaunaga e aunoa ma le tau malaga mai ai i Upolu e faamamā le toto auā o nisi e taitolu aso o le vaiaso e faatautaia ai lea togafitiga, o lona uiga o le tele lava o le taimi ua saili foi aiga i Upolu e faamautu ai.
