O le manaoga lenei ua tulai mai ona ua ta’ua e le Matagaluega o le Soifua Maloloina e uigaese le faaopoopoga o numera o tagata ua aafia ona o faamai o feusuaiga.
E tolu ituaiga faamai eseese o loo lipotia le maua ai o le toatele o le atunuu ae o le gasegase lea e ta’ua o le clamydia lea ua matuā iloga le maualuga tele o le numera o i latou o loo tauaveina. O le faamatalaga a le Fomai o le Matagaluega o le Soifua Maloloina, Toleafoa Leausa Dr Take Naseri, e faigata tele le sosolo a le faamai lenei ona e lē lagona e le toatele ona auga – ae e tele ina maua ai tina i taimi e agai atu ai e siaki pe suesueina a o maua i ma’itaga.
“E matuā faigata lava la ona taumafai e faasufi mai taitoalua poo uo tama a nei tamaitai ua aafia ona o le matamuli ae a lē omai e togafitia, e leai se aogā e togafiti ai o latou taitoalua poo uo tamaitai foi, auā e toe maua ai foi i alii nei e lē o togafitia nei faamai,” o se faamatalaga lea a le alii fomai.
O le mafuaaga lea o le talanoaina nei o faiga faavae ina ia mafai ai ona tuu atu se talosaga i le Matagaluega ma le Malo ina ia unai loa togafitiga fai toatele. Ona pau lea o le itu e manatu le Matagaluega o le Soifua Maloloina aemaise foi paaga o faalapotopotoga tuma’oti o loo nafa ma togafitiga o ia ituaiga gasegase e mafai ai ona togafitia le toatele e aunoa ma se matamuli.
O fualaau o le mūmū, fualaau o isi ituaiga faamai pepesi e tele ina faainu i le faiga lea o le faalautele o togafitiga ma o le auala lea ua moomia nei se maliega a le Malo e faatino ai. Faaalia e Toleafoa e leai se galuega poo se togafitiga e mafai ona faamalosia i se tagata ma seiloga lava ua aumai se latou maliega tusitusia ona faato’ā mafai lea ona faatino se isi laasaga tau togafitiga.
“O le mafuaaga lea o le faaopoopo pea o le numera o tagata aafia i ia ituaiga gasegase ma e matautia tulaga e oo i ai Samoa pe a lē vave ona togafitia i latou ua aafia mai i faamai o feusuaiga,” o se saunoaga lea a Toleafoa.
O le fuafuaga lea ua iai, a mae’a ona pasia fautuaga ma galuega faataatitia ua tuuina atu e pei ona potopoto ai i se fonotaga sui o le Matagaluega ma ana paaga e pei o le Aids Foundation, o le Koluse Mumu, o le Asosi mo le Soifua Manuia o Tagata Lautele (family health), ma isi lava faalapotopotoga tuma’oti o loo fesoasoani i le tautua faafomai ma tausi soifua i Samoa.
O le faamoemoe e matuā faama’oti galuega moomia ina ia mafai ai ona faainu fualaau ma fai ni tuiga pe a moomia mo i latou ua aafia. Ua iai le fuafuaga e faatutu ni nofoaga mo togafitiga i lotoa o Iunivesite i totonu o le atunuu, e lē gata i lea o lalo o pulu i luma maota o le Malo, ae faapea foi nofoaga faitele o loo tumutumu ai le atunuu e pei o maketi i Savalalo, Fugalei faapea ai Saleologa.
“E iai le talitonuga a le faia faapea se inumaga tele, e leai ma se suiga o le tulaga faaletonu ua iai le toatele o lo tatou atunuu ua aafia ma e lē o agai i falemai mo togafitiga,” o se faaaliga lea a Toleafoa Dr Naseri.
“O le taimi lenei e numera muamua Papua Niu Kini i tagata aafia i gasegase o feusuaiga, tulaga lua ai Samoa ma o se tulaga faaletonu lea pe a fuafua i le faitau aofai o tagata Samoa o iai nei, ae e ese le faigofie o le auala e taofia ai nei gasegase, ae e pei o le ma ua lē mafai ai lava ona agai mai i latou o tauaveina nei faamai e saili togafiti”.
O lea la ua faamae’a fuafuaga a le Matagaluega ma le faamoemoe e talia le talosaga o le a tuuina atu mo lenei faamoemoe tele.
