O suesuega a le Matagaluega o Mataupu tau tina ma tamaitai, atinae o nuu ma aga fesootai, ua maua ai o tausaga uma lava e tusa ma le to‘a 10,000 (sefulu afe) le numera o fanau e mae‘a aoaoga ia e ta‘ua o aoga tulaga lua.
O le tusa ma le to‘a 2,000 e maua avanoa e faaauau ai a‘oa‘oga i le tulaga tolu o a‘oa‘oga (tertiary) o le numera lava lea e lē atoa se to‘a 500 ae o le isi toatele lea e maua ai le 2000 e agai i aoga o matata eseese lea e saili ai loa tomai mo auaunaga o loo iai galuega i totonu o Samoa.
E silia i le to‘a 1000 o loo saili galuega i ofisa o le Malo, o le isi to‘a 2000 o loo galulue i pisinisi ma faalapotopotoga tumaoti ae o le isi 3000 ua nofo fale ma agai i atina‘e i le vaomatua poo le talaloa.
O se numera toatele tele lenei numera, ae o loo finauina pea e le Malo e lē mafai ona faapea mai o le numera lea o le toatele o loo i tua i tausaga uma ua leai ni galuega ona o loo faatino le tausi aiga, o galuega ia o loo faapea foi ona faatau atu ma maua ai seleni pe a atia‘e le eleele.
O le lē faigaluega e pei ona finauina nei, o i latou ia e lē o maua ni totogi i vaiaso taitasi pe tailua vaiaso foi.
O le au lē faigaluega ia ua manatu foi le toatele o le atunuu ua na o le agai mai i le taulaga ma faatupu faalavelave solo ai. Ae ua na o le pau lea o se numera ua laga i le suesuega lenei, e lē o taulia ai le toatele o tupulaga talavou o loo foi mai ma faailoga i tausaga taitasi ona tau saili loa lea o ni galuega.
O se numera lea e tusa lava ma le to‘a 3000 e lē o iai se isi laasaga ua agai i ai ma na ta‘ua e le Vaega o Tupulaga Talavou i Samoa ua agai nei le unai ina ia faamalosia atina‘e i totonu o nuu ma itumalo e mafai ai ona maua galuega mau totogi o alii ma tamaitai talavou ua mae‘a a‘oa‘oga ae ua lē maua ni avanoa e faigaluega ma tausi ai aiga.
O le faatuputupulaia o le numera o tupulaga talavou e lē o maua ni galuega e lē gata i Samoa ae faapea foi isi nuu tuaoi o le Pasefika, na laga foi e taitai o le Fono a Malo o le Pasefika le Pacific Island Forum, i ana iugafono ia na usuia ai le fono a taitai i Niu Sila i le tausaga lenei. Ua faaalia ai le popolega o taitai o le Pasefika, i le toatele o fanau a le itulagi ua tau saili ni galuega ona o le lē lava o nei avanoa e maua i motu laiti o le Pasefika.
O le mau a le Vaega o Tupulaga i lona faauluuluga le tamaitai o Seletuta, e tatau lava ona faamautu e le Malo atina‘e e pei o galuega e mafai ona faatautaia i faatoaga ma le sami e a‘oa‘o ai tupulaga talavou ma agai loa i ai e saili seleni e tausi ai o latou aiga.
Faaalia e lenei tamaitai le manaomia o se tali vave ma le mautu o lenei mataupu ona o tausaga uma lava ma faaopoopo pea i luga o le numera o le tupulaga e lē o toe maua se galuega ma aafia ai lava soifua o ia ma lona aiga.
I le faauuga a le vasega faavae a le Iunivesite Aoao o Samoa i Lepapaigalagala i le faaiuga o le vaiaso, e to‘a 409 tama ma teine na mae‘a tusipasi o lea vasega.
To‘a 60 na faamanuiaina i avanoa sikolasipi ia e ofo mai e le Malo o Ausetalia, Niu Sila, le Iunivesite o le Pasefika i Fiti ma Vanuatu.
E na o le 50 avanoa sikolasipi e totogi e le Malo e faaauau ai a‘oa‘oga mo faailoga i totonu lava o Samoa ae o le isi to‘a 299 o le a saili lava le avanoa o le tamaititi latou ma a leai se tupe a mātua e faaauau ai a‘oa‘oga nei i matata eseese poo le NUS foi e mautinoa lava ua mae‘a le soifua a‘oa‘oina o lea tama talavou poo le teine talavou foi, ma ona pau le isi auala e mafai ona faaauau ai o le saili loa o le galuega pe saili nisi a‘oa‘oga e mafai ona maua e aunoa ma le ituaiga tau lea e iai pili e aoga ai i le Iunivesite.
E lē o tagata uma e foi mai ma tikeri, o saunoaga ia o le aso o le faauuga, ae o le faatāua ia sailiili pea tama ma teine talavou o le atunuu.
Ae e pei ona vaaia, o le faaletonu lava e lē o tele seleni a mātua e faaauau ai a‘oa‘oga a latou fanau e nonofo i nuu i tua pe afai e iai se faamoemoe e tau savali mai e faatino a‘oa‘oga i matata eseese.
Ua mae‘a ona talanoaina le mataupu lenei ina ia iai ni matata eseese i itumalo ma o se tasi lea o auala ua laga atonu e mafai ai ona faaauau le tele o a‘oa‘oga a le toatele o fanau. Ua iai polokalame a le Talavou ua unai ai atina‘e a autalavou, aulotu ma afioaga.
Ua iai le sui o le tupulaga talavou ua ta‘ua o le sui o le Malo, o auala uma nei ua silasila ai i le tau tuuitiitia o le numera o tupulaga a Samoa e mae‘a a‘oa‘oga ae ua leai ni galuega mo i latou, ma o nisi ua agai atu i polokalame ia ua faatautai i le va o Samoa ma Niu Sila ina ia mafai ai ona saili ni lumanai o lenei toatele ua nonofo pea i Samoa.
O le faaiuga la o lenei tausaga lea foi la ua vaavaai i le to‘a 10,000 lea ua iu mai pe toafia o le a mae‘a ane foi faasoa ma le sailiga o ni a‘oa‘oga maualuluga poo galuega foi o totoe ua na o le nofo fale ma ua leai se isi faamoemoe e laasia ai le isi vaega o le olaga faaletagata matua.
