Sa matuā toatele le mamalu o le atunuu, aemaise o aiga uo ma paaga sa faailoa le faatumauina o le latou lagolago, i tapenaga a le Komiti Faafoe ma le faamoemoe i le sailia o se Tausala o Samoa i Niu Sila mo le tausaga nei.
E le gata ina faatumulia le nofoaga i Manhattan i le taumafataga sa faia ai, ae sa maitauina foi le leai o ni nofoa na avanoa i laulau sa faatulagaina, ma totogiina e tusa ai ma le polokalame sa fuafuaina.
O se ata manino lea, na faamaonia ai, o loo tumau pea le lagolagoina o lea taumafaiga, e ui ina sa faaseā ma faaleo ai finagalo lē fiafia o le toatele, ina ua faamanino nisi o suiga i fuafuaga fou a le pulega o loo iai nei, e pei ona sa masani mai i tausaga ua mavae.
O le faamoemoe o le komiti ma tamaitai ua sauni e tauva mo lenei tausaga e pei ona sa faataunuuina i le faaiuga o le vaiaso, o le sailia lea o se seleni e fesoasoani ai i taumafaiga uma mo le faamoemoe i le tausinioga tele e sailia ai se Tamaitai fou e nofoia le nofoa ma faaauauina tiute o lea foi tofiga mo le 2012.
O se afiafi matagofie tele ona e lē gata i aiga, uo ma paaga a tamaitai tauva, ae faapea foi le auai o kamupani ma pisinisi eseese, e faatino lo latou lagolago i le faamoemoe o tamaitai. O nisi o kamupani lagolago o lo latou ave le fesoasoani i le faamoemoe tuufaatasi o le Komiti Faafoe, a o nisi foi o loo lagolagoina tamaitai taitoatasi.
O se tasi o tamaitai tauva ua sauni na te luiina le tulaga Tausala o Samoa i Niu Sila, o Alana Tyrell mai le aai i Hemilitone, o le alo o le afioga ia Lesagalala Apulu ma le faletua ia Meta Tyrell. O se tasi o faipisinisi o loo fesoasoani i le sailia o avanoa faigaluega mo soo se tagata e aofia ai tagata Pasefika ma tagata Samoa, le ALIGNZ Recruitment.
O loo iai nei o ia i le Iunivesete i Waikato i le aoaoina o matata o le LAW ma le BMS.
E toaono tamaitai sa faamaonia mai ua nofo sauni mo le tauvaga e sailia ai se siamupini o le 2012. O se taimi e le toe mamao, o le a mafai ona faalauiloa uma ai suafa o tamaitai tauva, ona e lei sauni le Komiti Faafoe e faamatuuina i le taimi nei.
O le tamaitai o Metotisi Faalavaau-Komiti, o ia lea o loo nofoia le nofoa ma paleina le pale o le Miss Samoa New Zealand i le taimi nei.
