O le isi auala ua faaaogāina e le Mapu Maia e momoli ai se feau tāua e ala i le taofia poo le faaitiitia o le faaalu o seleni i taaloga faitupe, o le faia lea o le tauvaga solo i luga o le Radio Samoa.
O le Mapu Maia o se auaunaga o loo fesoasoani mo le mamalu o tagata Samoa, atoa ai ma tagata Pasefika, ina ia fautuaina pea ma fesoasoani i soo se auala e mafai ai ona taofia le faafitauli o le faaalu o seleni i ni mea lē aogā.
Na faamaonia mai e le tamaitai pule o lea auaunaga, le faletua ia Rufo Pupualii e faapea, e lē masino le mau faafitauli o loo fetaiai pea ma le toatele o tagata, ina ua lē mafai ona pulea a latou tupe maua, peitai ua faavalea ma ua tuinanau tele i le mau taaloga faitupe.
O lea faafitauli ua mumū faaafi ma ua sosolo faafaamai, ma e ono lē mafai ona tineia pe afai e lē saili fofo, ma fai i ai se faiga i le taimi nei.
Saunoa Rufo o le toatele o loo sulufai atu i le Mapu Maia mo se fesoasoani, ua lava lea e silafia ai le anoano o i latou ma aiga ua matuā faatoilaloina lava e tuinanau leaga i masini poka, ma taaloga ua gau ai tupe, ae ua faaletonu ai le fanau ua leai ni meaai e tausia ai. O se tulaga lē manuia tele lea pe afai ae aafia ai se aiga, ma ua taumafai foi le auaunaga e faatulaga ma ave le faamuamua i manaoga ua manaomia tele se fesoasoani mo se taimi vave.
O fautuaga ma lapataiga o loo tuuina i tagata lautele, ua mafai foi ona molimauina le aogā tele, ma ua fesoasoani foi e suia ai mafaufauga tau faaosooso e mafua ai ona toilalo popo le toatele o tagata i le faafitauli e pei ona ta‘ua.
O le tauvaga solo ua tapenaina nei e le Mapu Maia, ua faaautuina i le faaupuga faapea, Ou te puipui faapefea lo‘u aiga mai aafiaga o taaloga faitupe? Ua mae‘a ona fofogaina le atunuu i lenei faamoemoe, ma o le aso 16 o le masina nei lava o Aukuso, na amata ai ona faaulufaleina suafa o i latou e fia tauva i lea tauvaga.
A o le aso 31 o Aukuso o le masina lava lenei, ua faamoemoe e faagata mai ai ma tapuni ai le avanoa mo sui tauva.
O se tauvaga ua molimauina le toatele ma le anoanoai o le mamalu o Samoa ua latou matuā faatāuaina ma lagolagoina le tauvaga tusiga solo.
Sa fesiligia e le Samoa Times le toatele o tagata Samoa i Aukilani lava ia e uiga i le autū o le tauvaga.
Sa ta‘ua ai e nisi e faapea, e ui lava o se faiga faatauvaga, peitai o loo afifi ai se feau tāua tele. Ua tatau ai foi i tagata o loo fiafia e faia lea tulaga, ona toe silasila toto‘a ma faaaogā fautuaga o loo tuuina mai e le auaunaga, aemaise o le faamoemoe o le tauvaga solo ua fai nei.
O loo mafai ona maua le avanoa e lauina ai solo uma o le tauvaga i luga o le Radio Samoa, mai lava i taimi ua faatulagaina i le ao atoa ai ma le po.
O se faiga ua manatu le pulega o le a tele sona sao e saga faalauiloa atili ai pea le silafia o tagata uma i le leaga ma le matautia o taaloga faitupe pe afai e lē taofia i le taimi nei. E lē gata i lea, ae o se fafagu aogā foi mo nisi ina ia aua lava ne‘i tosina gofie i le faaosoosoina o lagona mo lea faafitauli leaga.
E 15 faailoga ua saunia mo le mamalu o le au tauva, i tusiga solo ua faagasolo nei.
Faailoga 1: Taumafataga mo le aiga e to‘a 6, faaopoopo i ai ma le $100 o pepa talaoloa e fai ai le faatau i le kamupani a Pak-n-Save.
Faailoga 2: Pusa o taumafa ma le $100 o pepa talaoloa i le Pak-n-Save.
Faailoga 3: Taumafataga mo le aiga e to‘a 4, ma le $50 pepa talaoloa mo le penisini o le taavale.
Faailoga 4: Pusa o taumafa ma le $30 pepa talaoloa mo le penisini o le taavale.
Faailoga 5: E $70 pepa talaoloa mo le penisini o le taavale.
O faailoga e 10 mulimuli e atoa ai le 15 o faailoga faatulagaina, e tai $50 pepa talaoloa mo le penisini o le taavale.
Ua iai foi le faamoemoe e faapea o i latou uma e toalima o le a maua faailoga lautogia pito i luga o le a lomia o latou ata faatasi ai ma latou solo sa tusia i luga o le Samoa Times, o se isi ponesi lea mo i latou sa fiafia e faaalu le taimi mo lea faamoemoe.
E mafai foi ona faailoa ane lau solo, ma tuusa‘o i le tuatusi o fesootaiga i luga o le initaneti i le tuatusi:rufo.pupualii@pgfnz.org.nz, poo le lafo mai pe tauaao mai foi i le tuatusi o le Radio Samoa ma le Samoa Times, 3/36 Hobill Ave, Manukau.
Ae mo nisi o faamatalaga moomia mo lenei lava tauvaga, e faafesootai ane pea le telefoni 09 369 0627.
