Toatele au fai saofaga e lē o toe totogia NPF

E latalata i le to‘a 26,000 le aofai o tagata faigaluega Samoa o loo totogi lava a latou saofaga mo le Faaputugatupe mo se Alamanuia o Tagatānuu o Samoa le NPF. O le isi toatele e tusa ma le 76,000 o loo iai saofaga ae e lei toe iai lava se tupe ua alu i nei saofaga.
O le mafuaaga tele o le lē toe iai o ni galuega e sau ai se NPF, o le isi mafuaaga tele o le siisii pea o le numera o i latou ua tuua le atunuu ae faamautu i fafo, e lei talaina lava foi a latou saofaga. O le isi lava foi toatele e pei ona molimau i ai le NPF, o loo maua galuega ae faavaitaimi ma o loo galuega totogi itula nisi ua lē o i lalo o lisi aloaia o tagata faigaluega tumau.
O le ā lava le mafuaaga, ae ua ta‘ua e le Pule o Tagata Faigaluega ma Galuega Faatino a le NPF, Afioga Tagaloasa Uili Matafeo, e tatau lava ona toe siaki lelei i latou ua tatau ona totogi NPF.
O le tumutumu o lenei tausaga i le tului o le NPF lea ua amata ona totogi atu – ua laga ai lenei mataupu. “O loo iai le tulafono, e tatau i pulega o galuega, ofisa ma kamupani uma i le atunuu ona totogi saofaga a o latou tagata faigaluega. Afai e lē faia e solitulafono ma e molia i luma o le Faamasinoga,” o se saunoaga lea a Tagaloasa Uili. “E lē o mālōlō foi le agai o sui o le NPF e saili i galuega o loo iai tagata faigaluega tumau ae e lē o totogia a latou NPF.”
O aiaiga o le totogia o NPF ua faapea ona aveese ai le 5% (lima pasene) o le totogi a le tagata i vaiaso uma poo le tailua vaiaso ma tuufaatasi ma le isi 5% (lima pasene) e totogi e le Ofisa poo le kamupani o loo galue ai. E tuufaatasi ona ave lea o le saofaga a le tagata faigaluega. E oo foi i tagata taitoatasi poo aiga o loo faafaigaluega se tagata ia i latou e tatau lava ona totogi uma NPF a tagata faigaluega tumau nei.
O le faafitauli o le toatele o nei tagata e lē o galulue tumau ma o loo faia mo ni itula o se aso poo ni nai aso foi o le vaiaso. E silia i le 20 miliona tala le tupe ua faaagaga mo le tului e 7% (fitu pasene) ua faasoa atu nei i le au fai saofaga. O le tului e lē na o tagata totogi saofaga o aofia ai, o loo aofia uma ai foi ma saofaga ia ua lē toe fafagaina. O le tele foi la o le tupe o le tului o loo alu i saofaga nei e lē o toe fafagaina.
“O le fautuaga masani lava ua ave i ofisa faigaluega – e tatau ona totogi mai saofaga a tagata faigaluega auā o le solitulafono le lē faia o lea tulaga”. O le uluai aso lava o le tului na molimauina ai e oo lelei i le tasi le miliona tala na faasafua atu i le au fai saofaga ma e mautinoa e uma le vaiaso atoa ua mae‘a foi ona tufatufa atu tului o lenei vaega o le tausaga.
O le isi suiga tele e ui o loo tumutumu lava le atunuu i le Ofisa o le NPF i aso faapenei, o le itu lea ua iai pepa tala tupe ma o le faletupe a le Westpac lea e fai faapaaga le tele o ana galuega ma le NPF i Samoa, ua mafai ona tala mai ai le tupe a le fai saofaga. E tumutumu lava auā e ui ua mafai ona alu sa‘o i le card a le tagata lana tupe, ae tatau lava ona oo atu i le ofisa e faatino le talosaga faato‘ā mafai lea ona faamatuu atu le tupe i lana teugatupe.
O le mafuaaga ona o loo toatele ua vave manao i le tupe ae a onosai lava ona tau lē alu lea e talosaga ae faatali le avatu sa‘o o lana tului i lana saofaga i lenei vaiaso poo le vaiaso fou foi.