Ua mae‘a nei ona piki le aufilifilia e tauaveina le igoa o Samoa i taaloga kilikiti mo le taamilosaga a le Pepsi ICC World Cricket League Division 8 lea o le a faia i Samoa i le masina lenei o Setema. O loo malaga atu ai le tele o isi atunuu e tauva.
O se avanoa tāua tele lenei ua faia ai i Samoa lenei taamilosaga tele ua avea ai Samoa ma atunuu o le Oceania e sui tulaga ma faalauteleina atu ai tu ma aganuu faaaloalo a ona tagata i isi atunuu o le a auai mai o le Asia Pacific Region mai i Iapani i oo atu i Samoa.
E avea ai lenei avanoa e momoli atu ai alofaaga ma faamanuiaga mo le susuga ia Daniel Enese Burgess ua na o le pau lea o se sui mai Brisbane Ausetalia ua filifili e taalo i le au a Samoa. E ui i le toatele o ē sa tausinio. O le aso 7 o Setema na tuua ai e Daniel Brisbane mo Samoa.
O le susuga ia Daniel o se alo o le susuga ia Nikolao & Ruth Burgess (Neiafu & Christchurch NZ) o loo lauiloa i Brisbane i le faleoloa o laei Samoa, DVDs ma CDs ma le lafoina o tupe i Samoa ma isi atunuu faapea le faatauina o le nusipepa o le Samoa Times.
O le filifilia ai o le susuga ia Daniel Burgess i le aukilikiti a Samoa, o se fiafiaga lea i le alii talavou faapea ona mātua, uso ma si ona tuafafine e toatasi aemaise Samoa uma i Brisbane.
O se talavou ua vaaia e le toatele lona naunau o ia os e Samoa moni e ui na soifua a‘e i Niu Sila ma e faalē matala lana faasamoa peitai, e taumafai lava e talanoa i le gagana Samoa ona ole vaai alofa i nai mātua matutua e asia ma faatau i lo latou pisinisi.
E tele taimi e malaga atu ai mo tafaoga i Samoa ma taalo i le au a Samoa e pei ona filifilia ai i le autaaalo a le atunuu i Indonesia i le masina o Iulai, ae o lea ua toe pikiina i le aufilifilia a le atunuu mo lea taamilosaga tele.
O se talavou o loo aoaoina i le Iunivesite o Grifith ma ua faamoemoe e faaiuina lona taumafai i le faaiuga o le tausaga nei ma o lona sini ia avea o ia o se alii leoleo ma ia suesueina tulaga tau le tulafono.
O le a malaga atu foi ona mātua ia Niko ma Ruth Burgess ma nisi o lona aiga i Samoa i le vaiaso fou mo le tapuaia o lea taaloga faitaulia. Manuia lou alo faiva Daniel aemaise o le au atoa ia maua le tomai faapitoa e mafai ai ona maua le sini e faafiafiaina ai mātua, aiga, Ekalesia ma le atunuu.
O le Aufili lenei:
Faafetai Benjamin Mailata (Captain)
Tiumalu Geoff Clarke (Vice-Captain)
Sean James Cotter
Winston Mariner
Faasao Fredrick Mulivai
Uala Kaisala
Pritchard Pritchard
Sipiliano Tua
Tiafala Alatasi
Daniel Enese Burgess
Naamanu Vaasili
Ian Christopher West
Murphy Logo Sua
Lautala Fuimaono
Murphy Logo Sua (Coach)
Aumua George Avia (Manger)
