E seāseā lava ni osofaiga faamalosi a leoleo, ona taunuu i se taunuuga faanoanoa i le maumau ma le afaina o soifua o tagata.
Peitai o se tala faanoanoa na tulai mai i le taeao o le Aso Gafua, aso 7 o Me, ina ua maliu se tagata, ma le toatolu o alii leoleo o loo manunu‘a, ona o se osofaiga sa faia e leoleo i le afioaga i Faleatiu.
O se faamatalaga sa faamatuuina mai e le Komesina o Leoleo, Lilomaiava Fou Taioalo e faapea o alii ofisa o loo manunu‘a, sa i totonu o le taavale sa taitaia le osofaiga.
O pulufana mai se fana e le o iloa foi i le taimi nei poo ai sa ia faapaina, sa aafia ai i latou. O le toatolu o alii leoleo sa aafia ma o loo manunu‘a, e aofia ai se Leoleo Satini e toatasi, ma le isi toalua o alii ofisa. Sa auina i le falemai o Tupua Tamasese Meaole ma faia i ai togafitiga.
O le toatasi foi o i latou sa matua aafia lona fatafata i se pulufana, ma o loo tigaina, a o le isi toalua o le vae ma le lima o loo afaina foi i ni pulufana.
E le o fia faia tele ni faamatalaga a le Matagaluega o Leoleo agai i le mataupu o manunu‘a ai alii ofisa, ae o loo matua taulai le vaai ma ave le faamamafa i le mafuaaga sa mafua ai le osofaiga.
Saunoa Lilomaiava e faapea, o loo maualuga pea le tulaga matautia ma le lamatia o alii ofisa ma tagata lautele, ona o le mataupu i le va ma Faleatiu ma le tulai mai o le faalavelave i le taimi nei.
Saunoa foi le alii komesina ma toe faamanatu, le tāua o le galuega a leoleo i taimi faapea ma soo se aso.
Ua matua malamalama lelei foi alii ma tamaitai leoleo i le tulaga matautia o le galuega, o le manunua ai o nisi o le aufaigaluega, o loo taliaina pea o se vaega o latou tiute ma galuega e tatau ona faataunuuina pea lava.
E tolusefulu se vaegaau faapitoa a leoleo ua mae‘a ona aoaoina ma faaaupegaina foi ma ua lava saunia lelei mo osofaiga ma ituaiga taimi faapea, ma o le a faaauau pea le faia o tiute faasaga i le fili ma i latou o loo faasagatau i le tulafono, aemaise o le puipuia o tagata lautele o le atunuu.
O le afioaga i Faleatiu, o se tasi o nuu ua leva ma o loo manino pea i le vaai ma le silasila a leoleo, ona o nisi foi ituaiga osofaiga faapea, sa faia i ai muamua i tausaga ua mavae, ma sa aafia ai foi le soifua o nisi o leoleo.
E le o aveesea foi le mataituina pea e le Matagaluega o soo se mataupu faapea e tulai mai i lea afioaga o le atunuu.