Faiaoga Sili le Lelei i le faatinoina o ona tiute
O le susuga ia Tauanuu Sealiimalietoa Perenise Tapu, o se tamalii Samoa, o ia foi o se faiaoga i aoga maualuluga i Niu Sila.
Ua na o ia le faiaoga mai le Pasefika atoa, na filifilia ma ua tauia i se taui tāua tele, O le Faiaoga Sili ona lelei i le faatinoina o lona tiute i totonu o aoga, e pei ona faatulagaina ai e le NEiTA (National Excellent in Teaching Awards).
E le gata o se Faiaoga Sili ona lelei le faatinoina o lona tiute, peitai sa faaeaina foi o ia o se faiaoga Samoa, sa matua maoae ma maualuga le aoaoina o le gagana Samoa i totonu o aoga.
O loo galue nei o ia o se Faiaoga mo le aoga maualuga a McAuley i Otahuhu, Aukilani i Saute, ma o loo faauluulu ia te ia le Gagana Samoa.
O le uiga o lea taui taua ma le sailigata, sa faavae ma mafua i le lelei faatino, poo le sili atu mai tulaga masani e fua i ai galuega a alii ma tamaitai faiaoga, mai lava i Aoga Amata, seia oo lava i Aoga Maualuluga ma Kolisi i totonu o le atunuu.
E toa sefululua faiaoga sa lautogia ma ausia lea tulaga taua i totonu o Niu Sila atoa. E mai le fuainumera itiiti, pe a fuafua i le aofai o faiaoga i le atunuu atoa, e toalua faiaoga Maori, toatasi le Pasefika, ua na o Tuanuu, ae o le toatele lava o Papalagi.
O le faapaleina o le fetalaiga ia Taunauu, poo le susuga foi i le alii faiaoga i lea tulaga taua, e iai le talitonuga o se fiafiaga tauave lea, ma se ‘ai o le tapuaiga a le mamalu i tamā ma tina matutua o le atunuu, faapea aiga o i latou o loo tu‘i le mulipapaga i aso uma, ma faia le faiva o le tatalo ina ia faamanuia le Atua, ma tapuaia tiute o alo ma tamafanau a Samoa i totonu o Niu Sila ma soo se tulimanu o le lalolagi.
O le tamaitai Minisita lava o le Matagaluega o Aoga i Niu Sila, Hon Hekia Parata, sa ia tauaaoina le taui mo le susuga ia Tauanuu, o se faailoga o le tauivi ma le anoa o lona taumafai.
E le gata i lea, ae o se taui anagata ma se aseta tāua foi lea mo le Matagaluega o Aoga, ma le atunuu atoa i Niu Sila ma Samoa foi.
O se talanoaga ma le susuga ia Tauanuu, na fesiligia ai, ona o le filifilia ai o ia i lea vaega taua tele o le galuega faafaiaoga.
E utiuti se taimi sa maua ma le susuga i le faiaoga, ona o tuatuagia i le galuega. Ae o se tasi o ana saunoaga na ia ta‘ua ai e faapea, e tusa ma le 600 faiaoga sa faaulufale suafa mo le faia i ai o le filifiliga, ae toaluasefulu na faapuupuuina i ai lea lisi. O faiaoga e toasefulu, faatasi ai ma Pule aoga e toasefulu foi. O le mae‘a o le isi filifiliga mulimuli na faalauiloa ai loa le faaiuga na taunuu i ai. E na o le toasefululua na filifilia, ae aofia ai ma Pule aoga e toafā.
O loo lomia foi i luga o tusitusiga faapitoa ma lipoti faalevaiaso a aoga, poo le Puletini a le Ola, nisi o vaega taua sa lipotia e tusa ai ma lea foi taumafaiga taua sa faamanuiaina ai le susuga i le faiaoga Samoa, Tauanuu Sealiimalietoa Perenise Tapu.
O nisi o tiute faataunuuina i totonu o le aoga a McAuley
E pei ona ta‘ua i luga, o loo faiaoga nei le susuga ia Tauanuu i le aoga maualuga a McAuley i Otahuhu, ma e lei mamao tele atu foi ona maua se feiloaiga ma ia, ma fetufaai ma faasoa i le tulaga o le taua ma le lelei aoaoina o alo ma fanau i le gagana Samoa, a o iai i totonu o Niu Sila, aemaise lava i latou na soifua ma tutupu a‘e i Niu Sila lava.
O se tasi o ana teine aoga, sa ia mauaina le uluai sikolasipi mo le Iunivesite i Aukilani, i le Gagana Samoa. O le taimi muamua lea na ofoina ai e le Malo ni avanoa sikolasipi mo le gagana Samoa i Niu Sila lava ia.
O lea feiloaiga ma Tauanuu, sa maitauina ai ma molimauina le tele o vaega sa faatino ma faalautele ai lona finagalo maelega ma le fiafia e fesoasoani mo le aoaoina o le gagana Samoa.
O faiga ma auala ua leva ona galue ai le susuga i le faiaoga, ma sa le latalata mai lana silasila, peitai sa mamao lana tofa i le faafaileleina o le gagana ina ia faaofigofie i mafaufau o tamaiti, ae ia le gata foi i le iloa, a ia faatino ma ia mautinoa o loo faaaoao i totonu o aiga, ma ola ai i aso faisoo.
O loo iai foi se polokalame i le kalena faaletausaga a McAuley, e malaga ai i Samoa tamaiti ma faiaoga, e faia soo ma afioaga ma nuu.
O le sini o lea foi fuafuaga tāua, ina ia mafai e alo ma fanau ona maitau, ma vaaitino i mea moni ma le faamaoni o loo faatino ai, tu ma aganauu a Samoa e ala i le fale o matai, o le soifua tautua faataulealea, atoa ai ma tiute faatamaitai ma Augafaapae o afioaga.
O ia faamoemoega uma, e taulai i le auga e tasi, o le soifua tauivi, maelega, ma le naunau o le alii Faiaoga ia Tauanuu, e faatino pea le atoatoa o lona tiute ma lona valaauina e pei ona galue ai.
E fiafia tele e galulue faatasi ma tamaiti aoga. E masani ai foi ona ia tuu avanoa i tamaiti e faaleo ma faatino ai o latou mafaufauga ma manatu, nai lo le ta pitotasi ma ave uma e le faiaoga taimi e tautala ai na o ia, ae le tuu avanoa mo fanau.
O le tasi lea o ona malosiaga i le aoaoina ma le tilivaina o le gagana Samoa, o loo fua mai ma avea ma faamaoniga o lona taumafai.
E le taumate o nisi ia o faamaoniga o galuega fita ma le anagata o loo mafua ai ona fua mai ai alo ma fanau, e le gata i le malamalama i le gagana, ae o le faapuutuga‘oa foi mo Tauanuu i lona faamoemoe sa taumafai i ai.
