Ua lē avea lo latou tino lapopoa, e taofia ai mai o latou mafaufau, o latou lava o ni Tausala ua sili atu ona lalelei, i Tausala Pasefika uma o loo alala nei ma nonofo i le konetineta o Ausetalia. Ina ua maua ai le avanoa o le Tamaitai Ofisa Sili o le MSPPS ia Victoria Tofaeono ma le Sui o le Samoa Times, na ia saunoa ai ma faamalamalamaina ai, le toe tapena atu lea o le Pulega a le MSPPS, e toe faaauauina lana tauvaga o Tamaitai Laulelei Tino Lapopoa, mo le Pale o le Tauvaga o le tausaga lenei, 2019.
Na saunoa foi Victoria, e na te faafetaia ai Tausala uma nei e toaono, ona o lo latou loto tetele ma le pulunaunau, ina ia fia avea lea o latou ma Tamaitai Tauva ai o le faamoemoe o loo lupe nei. Ae ina ua maua la le avanoa o le nusipepa e faatalanoaina ai nei Tamaitai uma e toaono, na matuā maofa lava foi le sui i le Samoa Times, ona o lagona faaalia o nei Tausala.
O le Tamaitai la o Asena Naleba o Fiji, e 26 tausaga na ia faamatalaina e faapea, “O lona avea ai ma Tamaitai tauva o le 2019, ona o lona manao lea e alu ese mai le li’o pumoomoo lea sa masani lava ona ia nofonofo ai pea i tausaga ua mavae, ma o lana lava foi lea lu’i mo ia lava i lona olaga.”
O le Tamaitai o Shannon Sale e 23 tausaga o Samoa, na ia faamatalaina e faapea, “I tausaga e tele ua tuanai, sa faigata ai ia te ia ona faaali atu i tagata ona mafatiaga, ona o lona tino puta. Ae peitai, ua ia mauaina le loto tele e faapea ane ai, ua tatau ona ou ta’u atu i tagata, o a’u lava lea, ma ou te matuā mitamita lava i lo’u nei lalelei.”
I le faaauau ai pea lava o le faatalanoaga a le Sui i le Samoa Times ma Tausala Tauva uma, na manino mai ai lava, o le lagona lava lea, na auga i ai o latou finagalo, o le mitamitaga ona ua mafai ona latou faatāuaina e i latou i latou lava, ae ua see ese ai mai le olaga matafefe sa latou tauaveina pea i tausaga e tele ua mavae.
O nisi la o nei Tamaitai Tauva, e aofia ai le tamaitai o Ofa Afi o Tonga ma Apoliki, o Talaopatina Sio 23 tausaga o Samoa ma Nice, o Latisha Afu 16 tausaga o Tonga ma Mauritia, ma Mariana Taua 26 tausaga o le Atu Kuki.
O le Tauvaga Tausala lenei a le MSPPS na uluai faavaeina lea e le Tamaitai Ofisa Sili ia Victoria Tofaeono i le tausaga na tea nei 2018, ma o le tausaga lona lua lenei. Na tupu mai foi ma faavaeina, ona o lana foi moemitiga, lea ua avea nei ma faataunuuga tāua o moemitiga mo nisi o Tamaitai tino puputa o le Pasefika.
O le faamoemoe ua taoto nei mo lea tauvaga tele, ua atofaina ai lava le masina o Aokuso o tausaga taitasi, e faataunuuina ai. Ae tatou talosia ia le faamoemoe o Tausala Lalelei o le Pasefika, e faataunuuina ma le manuia. Ma e faamuamua ai foi le mamalu lautele, ina ia aua loa ne’i toe faatali, ae faatau nei loa sau pepa ulufale mo lenei faamoemoe tāua. Ae mo le pulega a le MSPPS, ia manuia lo outou alofaiva ma le tapenaga o lenei foi tausaga. O outou māmā na.
