O le Aso Toonai muamua na tea nei sa amata ai, ae na molimauina le toatele o alo ma fanau ma mātua sa tilitili ane ma faaaogā tatau lea avanoa tāua.
O le sini ma le autū, ia sailia ma faatosina nisi o le fanau i lea foi taaloga tāua, aemaise o se taaloga foi e matuā tele se tamaoaiga e maua ai, pe a oo ina faamanuiaina ma avea ma polofesa i le taaloga.
Ae o se tasi o vaega sili ona tāua e pei ona maitauina i le amataga o le polokalame, o le maua ai o le mafutaga vavalalata a fanau Pasefika, e ala i le tele o vaega sa vaevaeina i ai mo le amataina o le faamoemoe.
E tele ma anoanoai polokalame eseese sa tuufaatasia e i latou polofesa, ma o la latou lea matafaioi o le fausia o amataga mautu ma le lelei e faavae ai, ma fesootai manatu ma le loto i le taaloga, poo le faatosina i ai o le tamaitiiti, ina ia mauaa le fiafia e taalo.
Na faaalia e le alii faiaoga sa nafa ma le faatulagaina ma le faagaioia o taaloga ma le polokalame, le tāua tele o le mautu o le amataga, ma le faagasoloina tatau, ina ia iloa e le tamaititi le tāua, malamalama lelei foi i le uiga o soo se gaioiga sa faatinoina, e aogā mo le taimi e tago ai i le pate tapolo ma faaaogā loa.
Ae o saunoaga ma manaoga o le komiti faafoe o lea polokalame, o le fia faia lea o ni suiga i manatu ma loto o alo ma fanau tutupu a‘e, i le tulaga o taaloga, aemaise o le taaloga tapolo e pei ona auga i ai le faamoemoe.
O le toatele o tupulaga ua na o le lakapi ma le liki ma isi taaloga o loo agai ma tulituliaupū pea, peitai e matuā tele foi se ‘oa ma le tamaoaiga, faapea nisi uiga lelei ma le tāua e maua ma o loo afifi i totonu o le taaloga tapolo.
O se fiafiaga i le komiti ina ua toatele ma vaaia foi le naunau ma le fiafia o fanau ina ua amata lea polokalame mo le taimi muamua.
