Ua amata e le NZ Pacific Kids Golf Academy, se faataitaiga fou ma se isi amataga tāua ma le aogā mo le fanau laiti.
O se polokalame e a‘oa‘oina ma faalauiloa ai le taaloga tapolo (golf), o se isi laasaga sa vaaia ma ua molimauina le tele o sona tulaga mautu i manatu ma loto o le fanau, ina ua amata faatinoina lea faamoemoe i le Aso Toonai, aso 21 o Ianuari, o le vaiaso na tea nei.
Na faaoso lelei fuafuaga a le taamilosaga faapitoa mo fanau Pasefika, ina ua filifilia ni sui se toalua mai lea polokalame fou, mo le saga a‘oa‘oina lea i polokalame tapolo, mai le faamalu tele o tagapolo i Aukilani.
O le auai o sui mai le Asosi Tapolo a Aukilani i le tatalaina o taaloga a tamaiti Pasefika, sa filifilia ai tamaiti e toalua, o le a fesoasoani malosi i ai le asosi, ina ia a‘oa‘oina fua mo tulaga uma e tapenaina ai mo lea foi ituaiga taaloga.
O se tulaga ua matuā faafiafiaina ai le komiti faafoe o le polokalame, le susuga ia Sam Achary o se alii faipisinisi lauiloa i Aukilani, o le susuga i le tamaitai o Esther Tofilau-Lakisa, faapea le susuga ia Faapo Ligaliga, ona o le faatāuaina e le asosi tele o le polokalame tau amata o le faamoemoe o tamaiti Pasefika.
E pei ona muai faalauiloaina e le Samoa Times lea fuafuaga tāua, ma lona autū ma le vaai mamao a i latou sa muai iloa ma mauaina lea foi faatatau ma le polokalame.
E amata mai i le lua tausaga e oo atu i le 19 tausaga le matutua o alo ma fanau Pasefika, sa valaauina faapitoa mo le polokalame faalea‘oa‘oga.
