E maoae foi le laasaga ua iai nei Samoa i le tulaga tau i le Lakapi. E fai o le siamupini i le Taamilosaga Faavaomalo o le Taitoafitu (IRB) ae ua faapea foi ona vaaia le manuia o ana taumafaiga i le lakapi taitoa 15 i le faato‘ā tatala ai o ana tausinioga faavaomalo mo lenei tausaga.
Ua manumalo ai ia Fiti ma mafai ai loa ona ia umia le Ipu o le Pasefika i taaloga ma au a Fiti, Tonga faapea ai le ‘au malosi ua vaaia nei a Iapani.
O le isi laasaga mulimuli nei, o le tulaga lea ua aloaia ai i se faaiuga a le Iuni Lakapi a Samoa le ofi atu o se isi tamaitai i totonu o lana Fono Faafoe poo le Fono a Faatonu.
O lea filifiliga ua faalauiloa nei ua tofia ai le tamaitai o loo umia le tofi Peresitene o le Iuni Lakapi a Tamaitai, o Mara Coffin ina ia avea ma sui aloaia o lea Komiti Faatonu. O le lona lua lea o tamaitai ua umia tulaga i totonu o le Komiti Faatonu o le Lakapi a Samoa.
Aisea e maoae ai lea tulaga? E oo lava i le fono tele o le Komiti Faatonu o le Lakapi a le Lalolagi le IRB e lē o iai lava se tamaitai i le taimi lenei.
O lenei faiga ua vaaia ai le faamalieina e Samoa o aiaiga a Malo Aufaatasi i lona vaega lona tolu, lea o loo unaia ai le tatau ona oo atu i le tausaga e 2015 ua ausia e atunuu uma o lenei faalapotopotoga o Malo o le Lalolagi, manulauti e aofia ai la ma le ave o avanoa tutusa i tamaitai.
O le masina o Iuni lea na aloaia ai le filifiliga lenei a le Iuni Lakapi a Samoa, ma o le isi tamaitai ua tele tausaga o i totonu o le Komiti Faafoe o lea taaloga, o le afioga Lafaitele Aiga Esera, le Peresitene o le Iuni Lakapi a Tamaiti Aoga.
O le Afioga Lafaitele Aiga o ia lea o le Pule Aoga o le Kolisi o Avele, se tasi o ‘au lakapi malosi a Tama Aoga i totonu o le Atunuu.
E telē le faamaliega o le Manulauti lona tolu lenei o le Meleniuma i le tofiga lenei ua faatino e le Iuni Lakapi a Samoa, ae o loo iai foi se isi galuega ua unaia ai lava lenei tulaga, ae e i le maualuga lea o fanau aoga. Ua faatautaia nei ni taamilosaga o lakapi a aoga laiti a le atunuu i le Apia Park ma ua tolu nei vaiaso talu ona faatautaia.
O lea taamilosaga ua tofia ai aulakapi mai i le Vasega Fitu ma le Vasega Valu o aoga laiti uma, ma o le ‘afa o le numera o ia tamaiti o teine. O ‘au uma o loo tauva ua na o ‘au lava o loo fefiloi ai tama ma teine aoga.
Ua iai foi se isi polokalame mo tamaitai lava ia i le lakapi o loo faatautaia e le susuga Henry Bryce, lea foi e faafoeina polokalame atiae o le lakapi a le fanau laiti i le vasega o tama, o ia foi e tolenia le Manu Iti, o le aulakapi a le fanau o loo ua maua avanoa e malaga ai i Niu Sila, Ausetalia ma isi vaega o le atunuu lava ia auā le unaia o lenei taaloga i fanau laiti.
O le tausaga lenei ua amata ai toleniga ma a‘oa‘oga o le lakapi i fanau teine, ma o se faamoemoe o le a telē le aogā o lea polokalame i le fafagaina o le Iuni Lakapi a Tamaitai o loo iai nei.
O le lua vaiaso talu ai na faamautu ai e ala i se savali tele i luma maota o le Malo i le Eleelefou le taumafaiga fai faatasi a le Iuni Lakapi a Samoa atoa ai ma le Lālā o Atinae a Malo Aufaatasi, lea o loo faamautu lona ofisa mo le Pasefika i Samoa nei, ma na tauaao atu ai foi ma se fesoasoani a lea faalapotopotoga UNDP mo le atinae o le lakapi i Samoa nei.
Faaalia e le lālā lea o Malo Aufaatasi i Samoa o le tāua o lenei taumafaiga ona ua vaaia le malosi o le lagolago a tagata o Samoa i lenei taaloga, ma o se auala foi ua vaaia ai le maua e fanau o isi avanoa e atinae ai lo latou soifua.
Ua fesoasoani foi i taumafaiga o loo unaia e Malo Aufaatasi, o le tuu atu o avanoa ina ia mafai ai ona tausi aiga ma tafi esea le ola mativa i atunuu tau atiae o le lalolagi.
E pei lava ona vaaia i le toe taliu mai ai o le Au Lakapi Taitoafitu a le atunuu, e maoae faamanuiaga tau tupe ua maua e ia alo o le atunuu e lē gata i tupe ae faapea foi isi ofo ua tuuina atu e kamupani eseese i totonu o Samoa.
O loo loma isi avanoa e maua ai seleni a ia fanau ma isi fanau a Samoa o loo tausinio i Taaloga o Malo o le Taupulega (Commonwealth) lea foi e faamalosia ai lava le ofo a le Malo e $10,000 (tala Samoa) e maua e soo se ‘au a le atunuu poo soo se alii poo se tamaitai taalo foi o Samoa e manumalo i se pine auro mai ia taaloga.
O taaloga o le Olimipeka ua faamautu ai foi le $100,000 (tala Samoa) pe afai e manumalo mai se ‘au poo se alii a o se tamaitai taalo foi o le a foi mai i Samoa ma se pine auro mai i ia tausinioga.
A o feagai ai la fanau a le atunuu ma sauniuniga i soo se taaloga faavaomalo i le itu o le atinae ai o lo latou foi tamaoaiga, o le isi laasaga lea ua vaavaai mai ai atunuu i fafo, o le mafai ona maua e tamaitai i lo tatou atunuu e fai filifiliga faatasi ai ma alii e ala lea i le umia o tofiga i totonu o se Komiti Faafoe o le Lakapi, o se taaloga o loo vaaia pea i Samoa ma isi atunuu o le lalolagi e faatautaia ai, le ave pea o le faamuamua i alii, pe afai e fai filifiliga o lenei faagatama.
