O le mae‘a ai o le taamilosaga faavaomalo a le Asosi Kirikiti faavaomalo lea na talimalo ai Samoa, o lea ua maua ai ma le avanoa o ni sui se toalua o le Asosi a le atunuu e faalautele atili ai le tomai i lenei taaloga.
O Ausetalia ua maua ai le avanoa mo aoaoga faaopoopo ma o i laua na faamanuiaina ai, o Aleki Iasoni, 20 tausaga le matua o le afioaga o Faleseela, ma Naamanu Faasili, 24 tausaga le matua o le afioaga o Nuufou ma Vaitele.
Faaalia e le alii o loo faauluulu i ai le Asosi o Kirikiti faavaomalo i Samoa, le susuga Andrew Flynn, o i laua ua maua avanoa nei mo Ausetalia, o ni tagata ua iloga le agai i luma i le taaloga ma na vaaia lava le maoa‘e o a la taumafaiga i le taamilosaga lea na mae‘a atu nei.
O le Faalapotopotoga faavaomalo o Kirikiti le SICA, lea e ana sikolasipi nei ma na ta‘ua e Flynn, e tāua tele le maua o nei aoaoga ona o le itu lea e lē o taitai lava meafaigaluega faaonapo nei i Samoa e faalautele ai le tomai i lenei taaloga.
“E iai foi le taamilosaga e faia ia Fepuari i le tausaga fou ua ta‘ua o le Asia Pacific Trophy ma e faia i Niu Sila, o loo fuafua atu ai le au a le atunuu. Ma o le auai atu ai o nei taulelea i lea aoaoga o le a maua ai foi ni metotia fou e faasoa mai i nisi foi e le o maua lea avanoa.” O le a siitia ai foi tulaga o le tala faasolopito i o laua olaga taalo ma faafaigofie ai ona toe filifilia i nisi o taamilosaga faavaomalo e fua i le iloa ma le tomai ua la maua. O le susuga ia Iasoni o le faate‘a faamoemoeina lea mai le kalapu a Faleseela ma ua faaigoa foi e le Asosi o le faate‘a lima taumatau lea ua iloga i le tele o taamilosaga i totonu o Samoa. Na filifilia foi o ia i le ‘au i lalo ifo o le 15 tausaga le matutua a le atunuu i le tausaga e 2007.
O le sui o le kalapu a le Wanderers le susuga ia Faasili na filifilia foi i le Au Sinia a le atunuu i le 2009.
O loo faatupe e le Asosi o Kirikiti faavaomalo le iai o i laua ia i Ausetalia, ae o le agai atu i lea atunuu ua faatupe e le Asosi i Samoa nei. O lea ua tuua Samoa mo lea faamoemoe.
“O se avanoa faaauro lea ia te au lava ia, poo le ā le mataina o lata taumafaiga i inei e lē latalata i tama ua iloga i le lalolagi i lea lava taaloga,” o le faamatalaga lea a Naamanu Faasili.
“O le isi itu o se taimi muamua lea ua ou auai atu ai i ni aoaoga faapenei, o lo‘u faanaunautaiga foi lea o le fia faalautele o le tomai i nisi o vaega e lē maua iinei.
O le vaega tāua foi o loo taulai i ai o le sailia o se avanoa e taalo ai i ni kalapu i atunuu mamao.”
O le faamoemoe foi lea o le Asosi Kirikiti a Samoa, ina ia tele nisi avanoa i le lumanai e unai ai le taleni o le kirikiti e auala lea i avanoa i totonu o kalapu kirikiti faavaomalo i atunuu mamao.
