Unasa Nomeneta Saili (Technical Director for SkyEye LTD – Geospatial Information and Communications Technology Company, ma si ona tuafafine Taimaaiono Agnes Kerslake o se tasi o le management ma lona uso o Faasootauloa Sam Saili SkyEye Pacific CEO

Unasa Nomeneta Saili (Technical Director for SkyEye LTD – Geospatial Information and Communications Technology Company, ma si ona tuafafine Taimaaiono Agnes Kerslake o se tasi o le management ma lona uso o Faasootauloa Sam Saili SkyEye Pacific CEO

O le saosaoa mai o tomai faaonapo nei ua oo iai le malamalama o le lalolagi, ua tele naua, ma ua lē masino le tele o ituaiga vaega faatekonolosi. O le loloto o suesuega ma tomai ona o faamanuiaga e ala i taleni mai le Atua, e lē lau maua foi e tagata uma se’i vagana ua tuu uma iai le loto atoa, fatu, mafaufau, tino ma le agaga.

O le aso 9 ma le aso 10 o Aokuso na usuia mai ai i le nofoaga autu o faatasiga tetele (Brisbane Convention Centre) le fono lona lua, lea na auai mai ai sui mai atunuu tetele o le lalolagi e aofia ai ma Samoa. O le talanoaina o auala mo le faalauteleina o le silafia i le faaaogaina o mea pu’eata faaonaponei, ituaiga foi nei e felelei i le vateatea (Drones) pei ni vaalele e tau le lagona ni leo, leai foi ni pailate ae faatonutonu atu i lalo o le fogaeleele, lea e fesuia’i ai vaaiga eseese i ni faamoemoe pe a pueina.

O lea faatasiga tele, sa auai sui mai atunuu eseese, faapea foi sui e toalua o Samoa o loo lauiloa i le la tautua o le SKYEYE Pacific. O lea igoa e faafaigofie lava ona maua e tagata lona uiga, ma e au atu lava le tautua i le atu Pasefika ae lē na’o Samoa.

O le masina ua tuanai na tatala ai le auaunaga a le SKYEYE Pacific i le atumotu o Tonga.

O le uluai fonotaga faapenei na usuia mai foi i le Brisbane Convention Centre i le tausaga e 2017, sa tuufaatasia ma auai mai ai sui mai malo tetele o le lalolagi e aofia ai Saina, Ausetalia, Iapani ma nisi atunuuu tetele ona o le fefaasoa’iga o finagalo i le alualu i luma ma le tāua o ni atina’e ma tamaoaiga faapenei ma lona gafataulimaina.

O le SkyEye Pacific o loo faauluulu i nisi o alo o le atunuu, Faasootauloa Sam Saili ma lona uso laititi ia Unasa Nomeneta Saili. E ui ua leva o latou tomai ma silafia, ae ua savalia nei le fa (4) ma le ‘afa tausaga talu ona tatalaina la laua lava tautua ma le auaunaga mo soo se faamoemoe.

O la tuaa o le Afioga Faasootauloa Sam Saili mai Saleaula i Savaii, Salamumu, ma Gagaifo i le Lefaga o se tasi sa avea ma sui faipule o le itumalo faaalalafaga o Gagaemauga Nu 2, ma sa avea foi ma Minisita o Tupe mo le tele o tausaga i paeaiga na tulai nai ai, faapea lo latou tina le Afioga Taimaaiono  Metotagivale Leaupepe-Saili mai Fasitoo-Uta ma Faga i Savaii.

E toafitu atoa i latou o uso ma tuafafine, ae o le toafa oi latou o loo galulue faatasi mo lea taumafaiga i le Pulega a le SkyEye. Na avea i laua ma sui e malaga mai i Brisbane, ma na’o le toalua ai foi Samoa sa filofilo i lea faatasiga tele.

O Faasootauloa Sam Saili, e 40 tausaga o lona soifua, (SkyEye Pacific CEO, 18 years in ICT sector with expertise in System Analysis and Design, Data Networks, Databases and Project Management. Secretary for Samoa Umbrella for Non-Governmental Organizations (SUNGO) and Treasurer for Goshen Mental Health Trust. Previous President for the Samoa IT Society)

O Unasa Nomeneta Saili, e 38 tausaga o lona soifua, (Technical Director for Skyeye LTD- geospatial Information and Communications Technology Company, founding member of Skyeye LTD). O Unasa ua silia i le 14 tausaga talu na galue mai i le geospatial/ICT industry, 10 tausaga i le public sector. O se tasi o atina’e na ia faatuina mai ma faaaogāina ai le Samoa Electric Power Corporation GIS system ma fausia ai se fesootaiga mo le faatuina o le SkyEye. O ona tomai ma silafia, sa a’oa’oina ai i le Iunivesite a le South Pacific, e aofia ai le Computer Science & Information Systems, o ia o se sui faavae o le Samoa Geographical Information Systems User Group.

O se tasi o faamanuiaga e ala i le $100,000.00 Ausetalia na o la maua mai le Frontier Innovators Award, na sponsor e le Australia DFAT, (matagaluega a le Foreign Affairs and Trade), na filifilia mai ai faalapotopotoga e (15) sefululima mai le Asia-Pacific, o i latou e mafai ona ausia ni metotia e faatino ai ni auala ma fausia ai ni matalalaga fou, ni atina’e mo ni tamaoaiga fou ae faasilisili ai ona maua le tomai faapitoa e gafataulimaina, kiliva, pe faasoa atu ai ia silafia i tagata lautele.

O le 15 o i latou nei e aofia ai le SkyEye Pacific, na filifilia mai faalapotopotoga e ova atu i le fituselau (700) sa iloiloina apalai. Na faaalia le agaga fiafia tele e pei ona ta’ua e le susuga ia Faasootauloa Sam ma Unasa Nomeneta Saili, o lenei $100,000.00 Ausetalia na faamanuiaina ai le SkyEye Pacific, o se fesoasoani lea mo i latou i le faagaioiga ma le atina’e o le tautua mo le alualu i luma ona e mautinoa lona manaomia i nei ona po.

“Making Lives Better” O le vision poo le silasila mamao lea a le SkyEye ina ia faafaigofie ona gafataulimaina mo le lelei ma le agai i luma. Na ta’ua e le faauluuluga o lenei tautua, o le faatāuaina o finagalo o tagata o loo faaaogāina le la auaunaga, o iina e fuaina mai ai nisi moemoe fou auā le lelei ma le alualu i luma o le SkyEye Pacific.

Pe laititi pe telē se galuega latou te faia, la te taliaina ma le agaga fiafia manaoga o tagata ma mautinoa e fetaui lelei ma gafataulimaina i le lelei atoatoa. O ni faaletonu mai ananafi, o iina e iloiloina ma silasila ai i ni vaega o loo moomia ma e ao ona faaleleia atili mo le lelei mo le sili atu o se isi galuega.

O se tomai foi i vaega tau faatekonolosi e fesootai ai e mafai ona o la faasoa atu ma fesoasoani pe a manaomia e soo se tagata Samoa aemaise le atu Pasefika ua faasafua iai lo la silafia ma le iloa e ala i le SkyEye. O lo la auai mai i le fonotaga tele talu ai nei, sa talanoaina ai le tele o vaega i drones, e matuai telē sona aogā ma ni a’oa’oga ma faa’oaina ai i laua aemaise le pulega a le SkyEye.