E toalua ni alo o Samoa ua la ausia se isi laasaga maualuga i totonu o le Kolisi mo aoaoga faamatata eseese a le Malo Ausetalia le APTC o loo i Samoa, ina ua faaeaina i le avea ma faiaoga poo trainer e aoaoina le toatele o alii ma tamaitai mai Samoa faapea isi atunuu o le Pasefika o loo aooga i lea kolisi.
O se matati‘a lea ua ausia e ni tamafanau a Samoa ma o se laasaga maualuga foi mo le Malo Ausetalia ua ausia talu ona faatuina lea kolisi i le tausaga e 2007. E lima isi lala o le kolisi lenei o loo i le Pasefika ma ua ausia ai foi e nisi le tulaga faiaoga.
O le susuga Tuasivi Notoa Kaleopa ua avea ma faiaoga atoatoa mo le aoaoina o le tomai tau uelo ma le soo u‘amea, a o le tamaitai o Danielle Ah Leong Leota ua avea ma faiaoga mo le mataupu o le hospitality poo le tomai i le tautua ma auaunaga tau i le tautuaina o malo ma tagata tafafao.
O i laua nei sa aooga i le kolisi o matata eseese lenei ae ua la faaalia e leai se manatu o le a oo i se maualuga faapea lo la aoaoina. Ua la faafetaia ai le Malo o Samoa ma Ausetalia ua avea lea kolisi ma avanoa e ausia ai ei laua se isi tulaga maualuga i lo la olaga aoaoina.
O fuafuaga alualu mamao a le Malo Ausetalia ia aoaoina lelei alo ma fanau a Samoa i matata eseese e maua ai galuega, aemaise o tusipasi ma faailoga mai le kolisi e amanaia i soo se atunuu o le lalolagi.
E tāua foi lea tulaga pe a malaga nisi ua pasi mai le kolisi e fia aumau i Ausetalia poo se isi atunuu auā o le a vave ona maua ai gluega.
O le isi faamoemoe o le pulega o le kolisi o matata eseese a Ausetalia ia iai le taimi e tuuina mai ai le aoga i tagata o Samoa ma isi atunuu o le Pasefika o loo faagaioia ai, ae ua iai nisi ua lava le tomai e avea ai ma faiaoga mo le faaauauina pea o lenei fesoasoani.
Ua molimauina le siitia pea o le numera o tama ma teine o le atunuu ua ulufale i le kolisi ona ua tele molimau lelei o aoaoga o loo faatino ai, aemaise lava o le tulaga maualuga o loo faaeaina ai isi alo ma fanau o le Pasefika ua iu mai lenei kolisi o matata eseese.
E lima isi lala o le kolisi lenei o loo i isi atunuu o le Pasefika.
