Toalua pepe ua maliliu ae fai mai e aua le popole

O manatu nei ua lagalagā ina ua mae‘a le vaiaso o laga i luga o nusipepa, leitio ma televise le mataupu lea ua fufulu uma ai nei falemai i le atunuu i ona potu taofia.

O le faamatalaga a le auaunaga faafomai ma le tausi soifua (National Health Service) o le galuega masani lava lea a le Auaunaga e taitolu masina ma faamamā falemai.

O le faamatalaga e moni o le isi lea tali atu a le auaunaga i le tulai mai ai o ni masalosaloga i se siama oona ua aafia ai le soifua o ni fanau se toalua ia Mati.

E toalua pepe e ta‘iono masina, na uma o la ola a o taofia ai i le falemai o tamaiti i Motootua. O le faamatalaga e iai le siama e faapuupuu le ta‘uga i le gagana Peretania o le MRSA – na maua mai suesuega mai i fafo sa maua ai i pepe uma nei e toalua.

O le faafitauli ua o latou ta‘ua ona e le mafai ona faamaonia poo siama tonu lava nei na mafua ai le maliliu o nei tamaiti talu ai  “… e aumai tamaiti nei i le falemai ua tigaina ma e tele isi mau siama na aafia ai”, o se faamatalaga lea a fomai ma le pulega faapea le sui o le fale suetoto ina ua fono ma tusitala.

Na valaau se fono ma nisi o tusitala na avanoa i le amataga o le vaiaso na tea nei, ona o telefoni ua lē malolo le agai atu i le falemai tele i Motootua ona o le popolega o tusitala, ua molimauina fetusiaiga i luga o upega tafailagi a nisi o le atunuu ua faapea ona lapatai solo o latou aiga e aloalo ese ma le falemai i Motootua.

Na tapa se finagalo o le auaunaga e pulea le falemai ma talo ai loa le fono lea. O le faamatalaga a le Ofisa Sili o le NHS – le Afioga Leota Laki Sio, o le fia faasa‘o lava o nisi o faamatalaga sese ua tala‘i solo i luga o upega tafailagi lea na mafua ai le fonotaga ma se faamalamaga mai i fomai o loo nafa ma le galuega o le tali atu i le atunuu.

Faaalia e Leota Laki o le faanaunautaiga lava o le Auaunaga faafomai ma Tausi soifua ina ia taofia ni faamatalaga e soona agai i tua ma faapopolevale ai le atunuu.

“E iai lava galuega ua faataatitia e tali atu ai le Matagauega i le ono tulai mai o se gasegase matautia e pepesi ma afaina ai le soifua o le toatele, ae o le taimi lenei e le o pepesi se faamai ae e iai le siama lea ua maua sa aafia ai le fanau lea”.

O loo tau saili lava la pe o totonu o le falemai na pepesi mai ai pe o tua i aiga ma aumai ai le fanau ua aafia.

O le faamatalaga a le fomai o loo faauluulu i ai le vaega o gasegase tau savali, o Dr Francis Maru ma le tamaitai fomai o Dr Aiga Sesega, o le siama e pei ona ta‘ua o le MRSA, o se siama e pipii i le pa‘u o le tagata ma e toeitiiti o tagata uma, a fai i ai suesuega, e maua uma lava i le pa‘u o le tino.

E feaveai solo lava foi lenei siama, e leai se isi e ma‘i ai, ae e aafia loa le tino ua iai se papala, o se po‘u poo se manu‘a ua sao i ai le siama lenei ae le togafitia pe avatu foi vailaau ma fualaau ae le uma inumaga, o iina loa e tulai mai ai le tigaina o le tagata ma maliu ai lava.

O le siama e pipii i le pa‘u ona o le afugia, palapala ma le vevela, ma o le ituaiga tau o Samoa e maua solo ai lava lenei siama i soo se tasi.

O le tali muamua la lea ua faia e le Auaunaga faafomai ma tausi soifua, o le fufulu uma o nofoaga ma potu taofia ina ia mautinoa e leai se tamaititi e toe aafia mai i lenei gasegase.

E lei tali mai le Auaunaga ina ua fesiligia pe toafia ni tagata ua aafia ma togafitia i le taimi lenei i lea gasegase, ona o le tala sei mae‘a suesuega ma faamaumauga, ae ua iai aiga ua latou ta‘ua le aafia ma ua aumai suesuega ua maua ai.

O falemai uma o le atunuu ua ta‘ua e i latou nei ua fufulu uma. Ma le faamatalaga la lea e aua le popole le atunuu, o lea ua tali atu le auaunaga i le tulai mai o lenei faafitauli.

O le tumama lautele lava ua faaauau i ai lapataiga, ona o le faamatalaga e taa le siama pe a le mama le tino, le mama ma le fale e nofo ai ma le siosiomaga masani lava o le tagata soifua.

O le fanau foi e tatau ona vaavaai lelei aua e taaalo ma e leiloa e fanau le ono aafia ai. Ua faaauau fetusiaiga ma le lagalaga a le atunuu ona o le faatali o le auaunaga seia tulai mai ni tulaga ogaoga i gasegase nei ona faato‘ā tali mai lea.

O le mau a le Falemai e iai lava ana aiaiga ua savalia ina ia mafai ai ona tali atu i faafitauli faapea o le soifua maloloina ae o le fai o le tiute a le atunuu i le tumama lautele, o le tali lea i soo se popolega tau faamai pepesi.

Faaalia e le auaunaga, e le pepesi i le ea e manavaina lenei gasegase, ae pepesi pe a pipii le tino o le ua aafia i se isi tagata o afaina le tino i ni manu‘a ma ni papala.