E lē o ‘alo le Matagaluega o Leoleo ma Falepuipui i le faia o le faaiuga amiotonu i nisi o le Malu o le Malo e tuuaia. O le mau lea a le Komesina Lagolago, le afioga Leaupepe Fatu Pula.
Ua fai si umi o tatali suesuega i le faaoolima o nisi o leoleo i le tina o Faasalafa lea na faamanu‘alia le pou o lona isu, ae ua mae‘a nei suesuega ma ua faia le faaiuga.
O suesuega na feagai ma le vaega o amioga taualoa poo le professional standards a le matagaluega o leoleo, ua faia ai le faaiuga a le Komesina o le Matagaluega e molia ni tamaitai leoleo se toalua i le moliaga o le faia o se faaoomanu‘a (actual bodily harm).
O moliaga solitulafono e mafua i tuuaiga na aafia le pou o le isu o le tina o Faasalafa Faafetai Sione o Tiavea-tai i se faaoolima a ia tamaitai leoleo, ua faamalolo lē tumau (suspend) mai i o la tiute e faatalitali ai le tuuina atu o le mataupu i le faamasinoga. “O le mea sa‘o lava lea ua fai auā e leai se isi e sili atu i luga o le tulafono”.
O le finagalo lea o le sui sooupu le afioga i le Komesina Lagolago, Leaupepe Fatu Pula ina ia fesiligia i le tulaga ua oo i ai suesuega i tuua‘iga na faasagasaga atu i leoleo, ina ua taofia le tina o Faasalafa i le numera tigaina i le maota gasegase i Motootua mo togafitiga. O le pou o lona isu na afaina e pei ona sa iai ni ata sa faasalalauina i nusipepa.
O le tasi o tamaitai leoleo o loo umia le tulaga satini, ae o le isi o se leoleo
poo se police constable ma o le vaega suesue o le ofisa autū o leoleo i Apia sa galulue ai.
O i laua ia faatasi ai ma nisi o alii leoleo sa galulue i suesuega o le maliu o se tasi o alo tamaitai o le tina o Faasalafa, lea na maliu i le ono tausaga ua mavae ina ua faaoolima i ai Faasalafa ma ona toalua le tamaloa o Faafetai Sione.
O suesuega sa tau sailia ai se vaega o le fanua o lea aiga i Tiavea-tai o loo tanumia ai le tino maliu o le teineitti o Esmay. Peitai i le mavae o le lua masina ma vaiaso o faia ia suesuega e lei mafai ona maua le nofoaga o tanumia ai le teineitiiti ona na faaalia e leoleo, e lei lagolago atu le ulugalii ia latou suesuega. E lei leva ona faailoa lea tulaga i suesuega, ae lipotia loa le aafia o le tina o Faasalafa i se faaoolima na manu‘a ai le pou o lona isu lea na tuuaia ai leoleo.
Faaalia e le sui sooupu le afioga Leaupepe Fatu Pula, o soo se tuuaiga ogaoga e aafia ai le auaunaga ma le tautua a Malu o le Malo, e lē mafai ona alofia pe natia i lalo auā e tatau ona faia le mea amiotonu, ma o leoleo foi o isi tagata soifua e tutusa lava ma soo se tagata e tuuaia.
O le Aso Lulu, 23 o Mati 2011 na logoina ai e le komesina le afioga Lilomaiava Fou Taioalo, i tamaitai leoleo ua molia i le faaiuga ua oo i ai suesuega faalotoifale a le vaega o le professional standards unit o loo nafa ma mataupu e tuuaia ai alii ma tamaitai leoleo.
O le aso 5 o Aperila 2011 o le a valaauina ai i le faamasinoga moliaga o ia tamaitai leoleo e toalua o loo taofia le faailoaina o o la suafa i le taimi nei. O loo faamalolo lē tumau i laua ae o loo maua pea o la totogi (suspend with full pay).
O nisi o alii leoleo sa molia foi i ni solitulafono ma faamaonia i le faamasinoga ua faia i ai faasalaga e tusa ma le tulafono.
