Alexandra Iakopo o loo tauaveina nei le pale o le Miss Samoa

Alexandra Iakopo o loo tauaveina nei le pale o le Miss Samoa

E to’aiva tamaitai talavou ua faamautu nei oi latou ia o le a tauva e saili ai se Tausala o Samoa o le 2018 i le 2019 ma o le tauvaga lea o le a taualuga ai polokalame o le vaiaso o le Teuila i lena masina fou.

O tamaitai ua faaulu mo le faamoemoe ua tulai mai o le taimi muamua lenei ua toafā ai ni tausala mai Ausetalia o le a tausinio, ae toatasi le tamaitai mai Niu Sila.

O le tamaitai tauva mai le setete o Victoria, o le tausala mai le setete o Niu Sa Uelese, o le Tausala mai Melepone, ma le tausala Samoa mai Ausetalia.

O tausala e toaiva e aofia ai Georgina Mulipola ua lagolagoina e le kamupani o le CCK, Norah Lio Setu Aloiai o le Miss Samoa Victoria, o le tausala Samoa mai Niu Sila o Cecilia Tufuga Fatu, o Lanuola Giselle Tuiletufuga Price o le tausala Samoa mai Melepone, o Dolores Cassandra Satiu Cufi o le tausala mai Salimu i Fagaloa, o le tamaitai o Sonia Piva ua lagolagoina e le Susana o Samoa, o Levalasi Vivian Su’a ua lagolagoina e le Naumati Creations, o Christie Retalila Temareti o le tausala mai New South Wales i Ausetalia, ma le tausala Samoa mai Ausetalia o Erin Noelani Taefu.

O le hall o le aoga o matata eseese a Ioane Poseko poo Don Bosco i Salelologa i Savaii o le nofoaga lea o le a faia ai le tauvaga e saili ai se tausala o le atunuu.

O le taimi muamua foi lea i le talasolopito o le Teuila i le 33 tausaga ua faia ai lea tauvaga i Puleono i Salafai.