“Matou te teena le faaiuga a le Fofoga Fetalai”…Palusalue Faapo II
O le a toe faia ni faigapalota laiti mo itumalo faafaipule se iva, i se taimi o le a faasilasila mai e le ofisa o le Komesina o faigapalota ina ua aumai se faaiuga a le Fofoga Fetalai le tofa Tolofuaivalelei Falemoe Leiataua, ina ua toe usuia le Fono Aoao Faitulafono i le Aso Faraile ua mavae, 29 o Me 2009. O le faaiuga lea e mafua i se faatonuga a le Fofoga Fetalai na poloaina ai sui faipule uma ua taua o sui o le vaega faaupufai o le Tautua Samoa, e tuuina atu ni tusi e faailoa atu ai o latou o sui o lea pati. Na usitaia e i latou le faatonuga ma tuuina atu ai tusi, lea na faatoa faasilasila e le nofoa (Fofoga Fetalai) i taualumaga a le palemene i le Aso Faraile, ua mavae e toaiva sui na tautino atu o latou o sui o le Tautua Samoa, e aofia ai le tofa Lealailepule Rimoni Aiafi, faipule o Faleata i Sisifo, ma Palusalue Faapo II o se tasi o faipule o nofoa e lua o Safata. O isi faipule o le afioga Fuimaono Te‘i, o se tasi o faipule o nofoa e lua o le itumalo o Falealili, Mulipola Oliva, sui faipule o Aiga i le Tai.
O isi e aofia ai Toluono Feti, sui faipule o Palauli, Ae‘au Peniamina, sui faipule o Falealupo, Vaai Papu Vaai, sui faipule o Vaisigano numera tasi, Motuopuaa Aisoli Vaai, faipule o Vaisigano Numera 2, ma Levaopolo Talatonu, o le sui faipule o Gaga‘emauga Numera 2. Ua na o le faipule o Palauli i Sasa‘e o Taua Faraimo, na ia faailoa i lana tusi i le Fofoga Fetalai e le o ia o se sui o le Tautua Samoa. O le tasi o faipule o Safata le afioga Tuia Logoiai Paepae Letoa, na faamavae ma lea pati ona o nisi o mafuaaga e afua i se finagalo o lona itumalo, faapea le sui faipule o Muagututia Siaosi Meredith. O le tofa Asiata Saleimoa Vaai, le sui faipule o Satupaitea na te lei talia le faavaeina o le vaega faaupufai, ona sa finau e o atu uma i lalo o lana pati o le SDUP aua ua maea ona lesitala faaletulafono. Ua na o le sui faipule o Lefaga ma Faleaseela, le afioga Le Mamea Ropati e lei auai i taumafaiga e faatu se isi pati fou, ae sa tumau lona avea ma sui tutoatasi ina ua malepe le SDUP ina ua taumafai nisi o faipule ma le sui taitai e suia le taitaiga.
Mafuaaga o le soloia o tofi faipule
O le soloia uma o tofi faipule o sui e toaiva o le Tautua Samoa, ona ua latou le usitaia vaega ma aiaiga o le Tulafono o Faigapalota faapea tulafono tumau a le Palemene, e ala i le faatuina o se isi pati fou ae ua maea ona o latou talia le avea ma faipule tutu toatasi. O le le lesitalaina faaletulafono, na faaalia e le Fofoga Fetalai i lana faaiuga o le aia tatau lava lea a le pati, peitai ua avea ma tulaga e fai ma alofaga o sui faipule ua avea ma sui o le Tautua Samoa, ae ua galo ai ia i latou ua latou faaseseina le atunuu. Na saunoa foi le Fofoga o le Fono, e le tatau ona avea tulafono na fau ma pasia e le palemene ma mea e ulagia e sui mamalu o le Fono Aoao, ma o lana faaiuga ua faia o le a fai ma alafua e lima taitaiina ai nofoaiga a le Palemene i le lumanai.
Teena le faaiuga
Ua sauni loia a le Tautua Samoa e tuuina atu se talosaga i le faamasinoga maualuga mo le faia o se poloaiga e taua o le interim injunction e taofia ai le faaiuga a le Fofoga Fetalai. O se gaioiga lea o loo faatali i ai le faafaletui pe a maua atu le faaiuga tusitusia a le Fofoga Fetalai ua soloia ai o latou tofi faipule mai nofoa o o latou itumalo sa filifilia i ai i le maea o le faigapalota tele a le atunuu i le tausaga e 2006. O se fuafuaga foi e faaalia ai le teena e le vaega faaupufai o le faaiuga.
Na saunoa le sui faipule o Safata sa avea ma minisita o le kapeneta i le vaega faaupufai a le HRPP, ae sa faamavae ma alu ese mai ai ona o le tetee i le suia o le itu auala, le afioga Palusalue Faapo II, e na te matua teena lava le faaiuga ua faia. O loo maualuga le talitonuga o Palusalue ma le lautele o sui faipule, e le oo se faaiuga a le Fofoga Fetalai i le faatuina o le latou pati i fafo mai o le palemene, i le soloia o o latou tofi faipule ae foi e toe faatino ni faiga palota laiti. Faaalia e le taitaifono o le Tautua Samoa le tofa Lealailepule, e matua faateia lava i latou i le faaiuga ona sa le mafaufau e taunuu se finagalo o le fofogapule o le Palemene i sea faaiuga.
E lei iloa se aso e faatino ai palota laiti mo sui e toaiva ua aafia i le faaiuga, ona seiloga e logo aloaia muamua e le Fofoga Fetalai le Ao Mamalu o le Malo e tusa ma aiaiga o le tulafono o faigapalota. A maea ona faatoa faatulaga ai lea o se aso e faatino ai e ala i se faasilasilaga o le a tuuina mai i le ofisa o le Komesina o faigapalota.