E toaiva nisi o alii ma tamaitai o le nuu o Solosolo ua molia i le faamasinoga ona o le tauaiina o le taavale a leoleo pe tusa ma le lua vaiaso talu ai, ma o se gaioiga na faaleagaina ai le taavale a le ofisa, ma aafia ai nisi o leoleo i ni manuaga.
O le vaiaso nei na valaauina ai moliaga o le toaiva lea i le Faamasinoga Faaitumalo i Apia, peitai ua tolopo sei faamaea suesuega a leoleo, ae ua poloaina se tusi saisai mo se tasi o tina o loo molia ona e lei oo atu i le fofogaina o le mataupu.
O le gaioiga na tauai ai le taavale a le ofisa o leoleo na faatea ai se tasi o aiga o le afioaga, le aiga o Pouniu ma lona toalua faapea le la fanau ma o latou aiga.
O le mafuaaga e pei ona avatu i nisi tusitusiga muamua, o se faalavelave na tulai mai ina ua oo atu leoleo i le fale o lenei aiga e fia faatalanoaina ni tagi ua oo atu i le Ofisa sa tuuaia ai le alii o loo maupaolo i le aiga lea i Solosolo, ona o taavale na ave i lea alii mo le faaleleia, ae maea ane ua leiloloa nisi o totoga o na taavale.
O le alii o loo maupaolo i le aiga, e faatu ai lava lona faleinisinia i le mea o iai le aiga o lona toalua i Solosolo.
O le tulai mai o lena faalavelave matautia i le va o leoleo ma le aiga, na tasi ai loa le faaiuga a alii ma faipule o le afioaga o Solosolo, ua soloia ai le aufuefue le aiga o lenei tama ia Pouniu. Peitai na toe talia lava i le vaiaso na sosoo ai e le nuu lenei aiga ina ua faatino se ifoga mo le talosagaina o se faamagaloga ma se avanoa e toe foi atu ai i le nuu.
E ui lava la ua toe talia le aiga i totonu o le faiganuu a le afioaga o Solosolo, ae ua taatia atu pea i le ofisa o leoleo tagi ua faia faasaga i nisi o le auaiga, ona o le faaleagaina o meatotino a le ofisa e pei o se tasi o van sa matua faaleagaina ma taei ona tioata.
Soloia se faasalaga o se ulugalii
I se isi tala mai le fa’amasinoga o le ulugalii o Ulofu ma Jacinta Saifoloi o Lotopa lea na la toe apiliina le faaiuga a le faamasinoga faaitumalo, ua leai se faasalaga a le faamasinoga maualuga ua toe faia ia i laua, ae ua talia le tuutuuga ua faia e le ulugalii ma le na tagi e togitogi atu le 13 afe tala na la faaaoga, e tai selau tala i le vaiaso.
O le ulugalii na faasalaina i le tolu tausaga i le falepuipui pea uma le masina e lei maea ona toe totogi le 13 afe tala a le na tagi sa la faaaoga, e faapea o se totogi amata o le tau o le fanua.
Ua talia e le faamasinoga le tusi a le e ana le tagi e faapea ua uma ona toe teuteu le mataupu, ma ua manao e toe tatala mai i tua lana tagi na faaulu i leoleo.
