Ua mae‘a ona folafola e le Alii Minisita o le Matagaluega o Faatoaga ma Faigafaiva, le Afioga Le Mamea Ropati, fuafuaga ina ia mae‘a le paeaiga o iai nei i le lima tausaga – ua oo atu i le 20% o le tamaoaiga o Samoa ua toe maua mai i faatoaga ma faigafaiva. O le taimi lenei o le 10% o le tamaoaiga o loo maua mai i ia atina‘e.
O se lipoti o ni suesuega na faatautaia e le Matagaluega o Faatoaga na faalauiloa mai ai e na o le 22% (pasene) o aiga i totonu o Samoa ua faalagolago tasi lava i faatoaga auā le atina‘e o aiga ma le itu tau i taumafa.
E lē o se maualalo lea na manatu le Alii Minisita e oo i ai le numera o aiga Samoa ua agai ese mai i le totoina o le eleele.
Ua tele faalauiloa, tele tauanau ma fautuaga ua faalele i taimi ua mavae aemaise o le agai mai ai foi o le faigamalo fou lenei ina ia toe foi lava tagata o Samoa i le totoina o fanua i soo se fua o faaeleeleaga.
Ua mafua lea ona o tuutuuga ina ia mafai e Samoa ona ausia se tasi o manulauti o le Meleniuma ua mae‘a faataatitia mo le tausaga e 2015.
O le itu lea e tatau ona oo atu i lea tausaga ua mafai e malo uma o Malo Aufaatasi ona faapea mai ua lava taumafa mo ona tagatanuu.
E aofia ai Samoa i nei aiaiga ma o le unai lea ua fai nei, a lē toe agai lava Samoa e totō faatoaga o lona uiga e matelaina pe a tulai mai ni faafitauli i le lumanai.
E lē gata i lea ua iai le manaoga o le faigamalo o iai nei ina ia mafai e Samoa ona toe agai i atina‘e sa mafai ona maua mai ai lana tupe maua i oloa faatau atu i fafo.
O le laitiiti o oa faalenatura o se atunuu o le faigata foi lea ona taumafai e ausia ni tamaoaiga lelei ma o Samoa le isi atunuu, ona o le laitiiti atoa ai ma le aafia gofie i mala faalenatura ua aofia ai i ia faaletonu ma o le taumafaiga lava, a lelei faatoaga ma le itu tau i faigafaiva o le a faapea ona mafai e Samoa ona faaopoopo lana tupe maua e tausi ma faaauau ai lona tamaoaiga.
Ua avea la faamaumauga nei ma auala ua toe agai ai foi le Matagaluega e lagalaga nisi o auala e mafai ai ona faasufi le toatele o aiga o Samoa e agai i le itu tau i faatoaga.
O le mau a le Alii Palemia e pei ona saunoa ai i le vaiaso na tea nei i le Palemene, o loo lelei le eleele o Samoa, ua faapea foi ona faamanuia mai le Atua i le tele o laau e mafai ona ola ai e pei ona ia faaalia o le itu tau i fualaau aina o loo pala ae o loo tagi lava le toatele ua lagona le afaina o le soifuaga ona o le siisii pea i luga o lona tau.
O le faamatalaga a le Alii Palemia ua ala lava ona mativa le tagata Samoa, o le faatuutuu i le paie ma ua musu e agai i le eleele. “…o le ā le finagalo o le Atua, o lea e foai mai manuia i tagata Samoa ae o loo alalaga lava i le mativa”.
Faaalia e le Minisita o Faatoaga – o le faafitauli ua vaaia e pei ona laga e le lipoti ua faalauiloa nei, ona ua toatele lava aiga ua iai tagata faigaluega.
Ua faapea foi ona faaopoopo pea le faalagolago i aiga mai i fafo e sau ai le tupe e tausi ai i latou.
O lea foi ua iai le isi ituaiga faifaatoaga ua maua nei, o i latou ua manatu ua lava laau e pei o le nonu e atia‘e auā o lea ua agai i luga le tupe maua e sau ai mai i le faatau atu i fafo.
Faaopoopo i ai ma mugala o le tausaga na tea nei, ua atili ai le toatele ua faamaamulu mai i le agai lea i faatoaga.
O le mau a le susuga Tuilaepa Lupesoliai Sailele Malielegaoi, ua toatele uia agai mai ma faamautu i le talafatai o le taulaga, ua leai se manaoga e toe foi i aiga ma fanua e lē o toe faaaogāina.
O le mafuaaga lea o le laititi o faatoaga ua vaaia i lenei vaitaimi pe a faatusatusa atu i tausaga ua mavae.
O le lapataiga a le Minisita o Faatoaga ma Faigafaiva, le Afioga Le Mamea Ropati, e tatau lava ona toe unai le agai o aiga e totō taumafa.
Ua iai taumafaiga a le Matagaluega e pei o le ofo mai o laau ma tiapula auā le toe foi o tagata e totō ma ua iai foi ni fuafuaga a mafai e faifaatoaga ona totō le eka atoa o taumafa e aumai e le Matagaluega, o le a totogi i ai e le Matagaluega ma se $500 faaopopo – a faaauau i le tausaga atoa lea taumafaiga ma ua tulai mai ua manuia e faaopoopo loa se isi eka o isi foi laau totō ona oo lea o le tupe maua a le faifaatoaga i le $1000.
O lea la ua tālia poo ai aiga o le a sagai atu mo le faatinoga o ia polokalame.
O le faamoemoe laualuga o le Matagaluega ina ia mafai ona faaopoopo le numera o aiga Samoa e agai i faatoaga auā a lē mafai ona faataunuu lea tulaga, o folafolaga e faaluaina le tupe o loo maua nei e faatoaga auā le tamaoaiga o Samoa, i le isi lima tausaga, o le a na o se miti ae o le a faigata tele ona faataunuuina.
