O le alaga fiafia ona ua toe taliu mai i fanua le tele o usugafono a Ekalesia na tuuvaa atu i Samoa e pei o le afioga ia Patele Epati Tamati ma le aumalaga a le autalavou Katoliko. Sa auai foi le Peresetene le susuga ia Faamatuainu Ili ma nisi o le aumalaga aemaise, lea ua toe atoatoa mea uma.
O le afioga ia Patele Epati Tamati sa tatalaina sauniga lotu ma faalaulelei le ala i le alafai mai i le taeao o le Aso Sa i luga o le leitio. O isi ekalesia sa toesea i Samoa i usugafono e aofia ai le Ekalesia Worship Centre faapea le Faasinoti Ekalesia Metotisi. Faafetai ua taumulia‘i galutau ma galu fefatia‘i ina ua feiloai i le lagi e mamā ma le soifua manuia mai le Atua.
O le Aso Sa na se‘i mavae atu nei i taimi masani o sauniga sa faia ai tolaulauga o iugafono a le Koneferenisi auā le silafia e aulotu uma a le Faasinoti Ekalesia Metotisi e pei ona nofo tatalo ai a o toesea le afioga i le Sea ia Soofa ma le faletua ia Logo Mulipola, faapea tausi matagaluega ma faletua ma le au usufono.
Na manino le mata o le vai ma faamalieina le au tapuai auā na logo faatutuila le faafofoga i le matagofie o tala ma ripoti o le malaga ma le usugafono.
Mo le silafia e sefulu aulotu poo Matagaluega o le Faasinoti Ekalesia Metotisi a Kuiniselani, ma o loo sologa lelei pea le loaloa o le Faasinoti Ekalesia Metotisi a Kuiniselani.
O le taimi nei ua toatele i latou o le Ekalesia A.O.G itu palagi o loo ua tuuvaa atu nei i Samoa i la latou foi usugafono.
