O le Aso Lulu aso 11 o Aperila 2018, na toe to’ai taunuu mai ai i laufanua o Sini nei le faigamalaga mamalu a le afioga ia Patele Maurice Thompson, le afioga i le Tiakono ia Kasiano Leaupepe, ma le Malaga Sa, lea na malaga faapitoa mo Bari ma Roma, ona o se valaaulia faapitoa mai Bari ma le laumua o le Ekalesia Katoliko.
Ona o le talafeagai o le taunuu mai o le Malaga Sa ma le talimalo ai o le afioga ia Patele ma Patele ma le Ekalesia i le Faigamalaga a alo ma fanau a le Kolisi o Samoa, lea ua faataoto ai le feiloaiga ma le Ekalesia sa nofo tapuai, i se aso o lenei vaiaso. Ae ua na’o le upu faafetai na fofogaina ele afioga ia Lafaitele lea na tulei i ai i le Aso Sa 15 Aperila, i le sauniga lotu tuufaatasi a le Ekalesia.
E ui lava i lea, ae na maua lava le avanoa, e faatalatalanoaina ai e le Samoa Times le susuga ia Sitagata Atonio Sitagata, mo le fia talatalaina o ni tala o le malaga. Ona e lē o po lava se lilo i le atunuu faitau, o le nusipepa lava lenei sa lipotiina taualumaga uma o lenei faigamalaga a’o fuafua malaga atu mo le valaaulia. O se vaega la lenei o le faatalanoaga ma le susuga ia Sitagata:
ST: Faatalofa atu i lau susuga i le Ta’ita’i Malaga, lau susuga Sitagata Atonio Sitagata. Faamalo le folau faamalo foi le malaga manuia. Faafetai foi ona ua toe maua lenei avanoa ta te faasoa ai, ma se’i fai foi se tala o le faigamalaga, e pei ona outou tuuvaa atu ai ae tapuai foi le afioga ia Patele Fereti ma le paia o le Ekalesia Katoliko i Sydney ma Wollongong i Ausetalia nei ?
SAS: “Faafetai Vui, ae o le toesea o le Aufaipese Faapitoa i se valaaulia mai se tasi o Matagaluega Katoliko i le aai tele i Bari, Italia latou te lagiina viiga o le Atua i Saunigalotu o le Aso Maliu ma le Eseta e pei ona mavae atu nei.
Na taunuu ma faamautu lava le faigamalaga i le Matagaluega Katoliko i totonu o le aai tele i Bari, Italia, o loo galue ai le tamaitai sa Samoa o Sr Valentina Kasiano.
Sa faatinoina uma lava le auaunaga a le Aufaipese Faapitoa e ala i le peseina o viiga o le Atua i Saunigalotu o ia aso faailogaina i totonu o le malumalu tapuai o le Matagaluega lava i Bari. O le Aso Lua 3 Aperila 2018, ina ua mae’a le Eseta, sa malaga ai loa le Aufaipese Faapitoa mo le Vatikano i Roma. I le taunuu atu, sa mafai ona maimoaina nisi o nofoaga mataina i totonu lava o Roma, e iai le Paselika o Sagato Paulo, le Koloseo (Colosseum) ma nisi nofoaga tetele.
O le Aso Lulu 4 Aperila 2018, o le aso lea na auai atu ai le faigamalaga i totonu o le Faatafafa o Sagato Petelo (St Peters Square) mo le taliaina o le Faapaiaga ma le Faamanuiaga Faapitoa a le Tama Paia i tagata malaga mai atunuu eseese o loo lolofi atu i totonu o le St Peters Square.
Ina ua mae’a lea sauniga, sa maua ai loa le avanoa e feiloai ai sui o le faigamalaga ma le Tama Paia ma tauaaoina atu ai le faigameaalofa i lana afioga mai le faigamalaga e ala i mea taulima Samoa sa tapenaina. O le Aso Tofi 5 Aperila 2018, sa osia ai le Taulaga Paia o le Misasa i totonu o le Vatikano ma sa taitaia lava lea saunigalotu e le Afioga Patele Molesi Thompson a’o viiga o le Atua sa peseina lava e le Aufaipese Faapitoa.
Sa mafai foi e le faigamalaga ona maimoaina le nofoga o loo lagomau ai Tupusa uma lava o le Ekalesia Katoliko e amata mai lava ia Sagato Petelo seia oo mai ia Sagato Pope Ioane Paulo le lua.
Na tuua e le faigamalaga le Vatikano ma le aai tele o Roma i lea lava aso ma toe taliu atu mo le aai i Bari sa faamautu ai le faigamalaga. E tele foi nisi mataaga ma nofoaga iloga i talaaga o le Ekalesia Katoliko i fafo mai o Roma sa asia e le faigamalaga, e iai le malumalu tele lava o loo taoto ai i totonu o le pusa tioata le tino maliu o Sagato Padre Pio, ua silia ma le tolusefulu tausaga talu ona maliu ae o loo atoatoa lelei lava lona tino e pei lava o loo soifua.
E anoanoai le tele o nisi nofoaga o loo lagomau ai le Au-Paia ma vaega o loo faatauaina i talaaga o le Ekalesia i mea sa tutupu ai. I le faaiuga o lena lava vaiaso, sa taumavae ai loa le faigamalaga a le Aufaipese Faapitoa ma le Matagaluega Katoliko i Bari.
Na toe taliu mai ma taunuu le malaga-sa i laufanua o Sini, Ausetalia i le taeao o le Aso Lulu 11 Aperila 2018. E toe momoli atu ai foi le faamalo ma le faafetai tele Vui ma le auaunaga a le nusipepa a le Samoa Times, ona ua matou maitauina lava le galuega mae’ae’a a la outou tautua, aua ua le gata i le amataga o le faamoemoe o le Malaga sa, ae o lenei lava ua oo lava i le toe taunuu mai i fanua, e lē o tuuaunoaina lava le mulimulitai pea o la outou tautua, se ia mae’a lava le tala o lenei faigamalaga.
E fai ai o lo’u faatauvaa ma fofga taumomoli o le afioga ia Patele Maurice Thompson ma Patele Fereti, le paia i tamalii ma failauga, ae tainane o faletua ma tausi ma alo ma fanau a le Aufaipese Faapitoa ma le Malaga sa, matou te faamanuia atu ai i la outou galuega taulogologo. Ia alofagia e le Atua lau afioga ua fai ma sui o le auaunaga a le Samoa Times, ae faapea foi i le Pulega ma le Aufaigaluega uma, ia maua pea manatu ma le soifua filiga, e tautuaina ai pea o tatou tagata Samoa faafogafoga i itu e fa o le lalolagi, o outou mama na”.
