Toai i fanua le Amepasa o le Malo o Siamani mo Samoa

Ua faafeiloaia nei i Samoa le Amepasa o le Malo o Siamani, e pei ona faataunuu ai lena sauniga taualoa i le taeao o le Aso Lua, 16 Iulai 2013, i le maota o le Ao o le Malo i Tuaefu.
Na muai faia le ‘ava o le feiloaiga ma tapa ipu ai lana afioga ma le aumalaga, ona sosoo ai lea ma le feiloaiga ma le Ao o le Malo Afioga Tuiatua Tupua Tamasese Efi.
Na taunuu mai le afioga Dr Anne-Marie SCHLEICH i Samoa nei i le Aso Toonai, 13 Iulai, ae o le aso 16 lea na faataunuu ai le sauniga mo le faafeiloaiga aloaia.
I talaaga o le soifua galue o le tamaitai Amepasa, na molimauina ai le tele o nisi o atunuu o le lalolagi na galue ai muamua.
E pei ona avea ai o ia ma Amepasa o Siamani i le atunuu o Sigapoa i le tausaga e 1982- 1985, Bangkok 1985-1988, Islamabad 1995-1998, Lonetona 2004-2008. E talu mai le tausaga e 2008 sa avea ai o ia ma Konesula o le Malo o Siamani i Melepone i Ausetalia.
Na soifua mai lenei tamaitai i le tausaga e 1951 i Saarlouis, ua faaipoipo, ma e toalua ona alo.
I le saunoaga a le Afioga i le Ao o le Malo na ia ta‘ua ai le tele o itu o loo galulue vavalalata ai Malo e lua o Samoa ma Siamani, i tulaga o upufai o Malo aemaise o tulaga i le atinae lautele.
Na ia saunoa foi e faapea, e lē itiiti le sao o le Malo o Siamani i le talafaasolopito o Samoa e lē gata i ona upufai ae faapea foi i atinae esesese.
Ua mae‘a foi ona tino ia upu ma ua ova atu ma le 20 tausaga o ia feagaiga feosiosiai e pei ona ua mae‘a ona tuufaatasia.
Na tatala le vaega muamua i Ueligitone i le tausaga e 2011 ma faaigoaina Samoa ma Siamani, o le tuufaatasia o vaega ua tuanai faapea ai ma le uo mamae i le taimi nei.
I le saunoaga faaiu a lana Afioga i le Ao o le Malo na ia momoli ai faamanuiaga mo le Tamaitai Amepasa i ona taimi uma o le a nopiai ai i Samoa aemaise o tiute o le a feagai ma ia.