Toafā tamaitai filifilia Kapeneta faigamalo fou Amerika Samoa

O le faigamalo fou ua tulai mai a Amerika Samoa e pei ona avea ai le afioga Lolo Matalasi Moliga ma Kovana Sili, ua ia filifilia ai ni tamaitai se toafā i totonu o lana pulega ma ua avea ma sui o lana Kapeneta.

O ia tamaitai e toafā ua ia filifilia ua aofia ai ma le tuafafine o se tasi o tamalii ua leva tausaga o avea ma faipule o Amerika Samoa i totonu o Uosigotone le tofa Faleomavaega Eni Hunkin.

I le saunoaga a le Kovana Sili i le tatalaina o le tauaofiaga lona 33 a le fono na ia tolaulau ai suafa o i latou ua filifilia i lana Kapeneta e aofia ai ma tamaitai e toafā.

O Dr Salu Hunkin Finau ua avea ma faatonu o aoga a le teritori; o Dr Claire Pumele ua tofia e avea ma faatonu o le pulega o uafu poo le Port Administration; o Dr Ruth Matagi ua avea ma faatonu o pulega o gataifale ma le siosiomaga; ma Faleosina Voigt ua avea ma faatonu fou o galuega a le Malo. O le isi o tamaitai ua tofia o Taeaoafua Dr Meki ua avea ma faatonu o le Human and Social Services.