Mai i le 4am i le taeao na amata ai le tumutumu o le Malae o le faautugatagi i Tiafau i le taeao o le Aso Faraile le aso muamua o Iuni – e faamanatu ai le 50 o tausaga o le tutoatasi.
Mai i lea taimi atoa seia oo i le 1pm i le aoauli, o faagasolo lava solo a aoga, faalapotopotoga lotu, faalapotopotoga a nuu, ofisa ma sui o malo eseese o loo faamautu i Samoa auā le faaaloalo tele lenei mo Taitai ma le Malo o Samoa.
E uigaese le tumutumu na vaaia i Mulinuu i le taeao o le Aso Faraile lea, e fai o le poloka o le auala mai i luma o le Tanoa Tusitala na matua faamalosia ai le savali o le toatele ua masani e agai i lea itu o le taulaga i taavale, ae o le aasa o le la e ui e lei malosi le susulu.
O le toatele ua faatatope i le malae i Mulinuu mo le faapotopoto ai o a latou savali taitasi ae ua lē lelei ai se malu o le taeao.
O vaega uma ia ua tuuaia i le toatele o tagata na faapea ona ave i le falemai ma le ofisa o le Fono a Ekalesia Soofaatasi i Mulinuu lea na pei o se falemai ina ua saputu atu le toatele na avatu mo se malologa a o se vai ma togafitiga muamua ina ua faaletonu i le taimi o le sauniga tele lea.
E lei malolo le taavale a le falemai ma taavale a le Koluse Mumu i le faatatope atu o i latou na matapogia i lea aso, lea na toatele lava i le fanau aoga laiti.
Faaalia e le sui o le Koluse Mumu o le toatele lava e lei tuga le tulaga o le soifua maloloina, na o se manaoga lava ia nonofo i lalo, maua sina savili ma aveese mai i le la ae o suesuega i lea aso na manino ai lava na mafua le matapogia o le toatele ona o le vevela ma le mole o le manava.
O le isi tulaga faigata ua tutu uma ae ua matuā tau leai se nofoaga e mafai ona agai i ai le atunuu na tutū mai lava i le fa i le vaveao (4am) e faatali le mae‘a o le sisiina o le tagavai o le atunuu atoa ai le malelega a le Ao o le Malo i le mae‘a ai o le sauniga lotu lea na taitaia e le Peresitene o le Ekalesia Metotisi i Samoa, le susuga Rev. Tupu Folasa II.
E mae‘a uma ia sauniga, sosoo ai ma le faaaloalo o fana fanua e 21 – ua leva ona oli mai savali. Na oo atu i le 189 faalapotopotoga na savavali i le savali faaaloalo ma na iu lava ina unai i le maso le faiga o savali.
Ua fiu e avatu le lisi i nisi o faalapotopotoga ae ua agai sa‘o lava i tua mai o aoga sa aooga ai ma agai mai ai loa savali a nisi o faalapotopotoga.
Na alu foi le fia vevela o faleaiga sa laina ai i Mulinuu, ae na ona taape mai lava o solo vaai atu ua tutū faleaiga ua uma niu, uma le apa inu uma le fagu vai ae talu ai o le poloka atoa o le alatele ua lē sao mai ai ni taavale na umi se taimi o tau tamomo‘e sui o faleaiga agai i Savalalo e toe sau ai le uta o vai, ma taumafa, e oo lava i BBQs na alu alu lava tutū ae ua na o le agai atu o tagata e saili taumafa ma meainu i le umi ai ona faasolo mai o solo i le taeao o le Aso Faraile.
E oo ane i le aoauli ua amata fiafia faaleaganuu ua matuā le ofi luga o taligalu o Mulinuu i le faagasolo mai ai o le mamalu o le atunuu. E mae‘a lava le faaaloalo ma faasasa‘o mai e saili se paolo i le vevela o le aso. Sa iai nai timu māmā ae e lei umi lava foi ae toe susulu malosi mai le la o le aoauli.
Faaalia e le sui o le Koluse Mumu ia Goretti Fruean, o le toatele na aafia o le fanau ma tagata mai fafo. Sa aofia ai foi ma se tina ma‘itaga e lima masina le to ae na ave sa‘o lava la lea tamaitai i le falemai i Motootua faatasi ai i latou sa iai se popolega e tele atu le aafiaga pe a le vave i ai togafitiga.
O le faafetai tele lava o le leai o se isi na maliu mai i lea aso fiafia o le atunuu.
