E le toe tau faailoaina le tautua a le kamupani lafo tupe faamomoli o le Pacific Ezy Money Transfer i Samoa ma Niu Sila, aua ua lauiloa i ana tautua e ala i foai mo faalapotopotoga tumaoti ma ekalesia ae ua oo lava foi i tagata taitoatasi ua le solomuli ai le kamupani.
O le faalauiloa a le kamupani mo le Aso Sa o Tina ma le 50 tausaga o le Tutoatasi na filifilia ai mai i se se‘i le toa 16 ua sosola ma faailoga o le faalauiloa.
O le saunoaga a le tamaitai pule o le kamupani i Samoa o Lynnette Ah Kau, na ia faafetaia ai le atunuu atoa sa faaaogaina tautua ma auaunaga a le kamupani i le vaitau o faapitoa.
“O le naunauta’iga lava ina ia faia pea faapitoa aua o se tasi lea o ala e faatino atu ai le agaga faafetai o le kamupani i ana paaga aemaise i latou uma o faaaogaina le tautua a le matou kamupani”.
Na faaalia e se tasi o tama matua na laki i faailoga o le faapitoa o Gasolo Tuiga mai Vailuutai, e lei mafaufau e maua sana lua selau tala ina ua mae‘a le sisiga fu‘a sa faamanatu ai le limasefulu tausaga o le tutoatasi aua ua itiiti lava lana faasoa i le itu tau tupe. Peitai ina ua valaau atu le kamupani sa lagona lona faafetai i le Atua o lea ua avatu se isi fesoasoani mo ia. O le to‘a sefululima ua manumalo i le ta‘i luaselau tala e aofia ai Doreen Ah Sam o Vailele, Gasolo Tuiga o Vailuutai, Susana Peau o Magiagi, Lanuola Gisa o Falelima, Epenesa Faaofo Moa o Salelologa, Natasha Mamea o Motootua, Leafa Usumanu o Leauvaa, Taulagi Pio Fogavai Magiagi, Etimani Faamoe o Fasitoo, Naomi Togafau o Tuanaimato, Valasi Matagi o Papaloloa, Okesene Vaalotu o Samusu tai, Fuapine Vaifale o Faleasiu, Niko Fuatafea o Fasitootai, ma Naama Upulasi o Maota i Savaii. O lē ua manumalo i le TV flat screen 42 inisi o Vinimoa Lemalu o Leauvaa. Ua faailoa e le kamupani le tapunia aloaia o lona lala i le maketi i Fugalei ona o fuafuaga a le Malo e toe fausia lea maketi i se tulaga sili atu ona lelei ma saogalemu mo le faaaogaina e le atunuu.
Ua fetaui le tapunia o lea lala o le Pacific Ezy ma le tatalaina o lona lala fou ua iai nei i le fogafale i lalo o le Faletupe o atinae o Samoa faafesagai ma le maketi o I‘a i Savalalo.
O loo tumau pea isi lala o le kamupani lafo tupe faamomoli i le Amau Mall i Saleufi, o le maketi i vaitele, o salelologa i le faleoloa o Avau ma Mateo ma le lala i Asau i le faleoloa o Tui Vaai.
