To‘a 11 faauu i le Kolisi a Piula

E to‘a 11 alii aoao ma o latou faletua na faauuina i le mae‘a ai o tausaga o aoaoina i le Aoga Faafaifeau i Piula i le faaiuga o le vaiaso na tea nei.
O se sauniga na matuā faasā ai se pueata i totonu o le malumalu ma fautuaina ai le toatele sa molimauina seiloga lava ua mae‘a le sauniga ua ta‘ape mai i fafo ona faatoa mafai lea ona pueina se ata.
E ui i lea sa molimauina lava le mamalu o le sauniga i le taofia ai foi o ia gaioiga i le taimi o le lotu. O le mau lea ua iai nei le Kolisi Faafaifeau ina ia sao le sauniga lotu ona faatoa feoai lea o nisi i totonu o le malumalu.
O tausaga uma lava e to‘a 10 lava aoao e ulufale i totonu o le Kolisi faafaifeau. O le numera faatulafonoina lea a le Ekalesia i ona sui i tausaga uma. O le tausaga lenei e fai o le tatala o le isi avanoa e tasi i sui aoao ua ulufale atu, e pei ona molimauina i le tautinoga i le amataga o le vaiaso na tea nei, ae o lea foi ua to‘a 11 ua faauu.
O le Kolisi faafaifeau i Piula e pei lava o le Kolisi Faafaifeau i Malua, o le aoga mo faifeau i Taufusi lea e faaigoaina o le RHEMA.
O Kolisi nei ua amanaia ma aloaia i Samoa e ala i le Pulega o Faailoga Taualoa ma aoaoga (Samoa Qualifications Authority) a latou taumafaiga e ala i aoaoga ua faatautaia ai i ia nofoaga.
Ua mafai ona ausia le faailoga ua ta‘ua o le Bachelor of Theology ma le Bachelor of Divinity, o le tikeri i aoaoga faa-Tusi Paia ma le tikeri i le faailoga o Mataupu Silisili. Ua mafai foi ona sue ai lava ma le tikeri o le Masters i Piula.
O se tasi o faiaoga ua faatautaia aoaoga i lea nofoaga, o le Afioga lea Aiono Dr Fanaafi Le Tagaloa ma le afioga foi ia Le Tagaloa aemaise o nisi o i latou o le ekalesia lava ia ua faiaoga ai i lea Kolisi Faafaifeau.