Tusia: Aumua Niumaana Lavea
Aukilani
Ua mae‘a ona filifili ma ua faalauiloa foi faalauaitele talavou ua faamanuiaina i avanoa sikolasipi a le faalapotopotoga a le Samoa Sports Association i Niu Sila, mo le tausaga na tea nei.
O i latou e pei ona manumaloina ia avanoa tāua, o le a mafai ona amata ma faagasolo aoaoga i le tausaga nei 2012.
O se pepa o faamatalaga na tuuina mai, o loo ta‘ua ai o le a faato‘ā faataunuuina le sauniga faapitoa e aloaia ai suafa o i latou ia, i le aso 2 o Fepuari 2012, poo le Aso Tofi o le vaiaso nei.
O le nofoaga o le Pacific Education i Aukilani ua fuafua o le a faia ai le sauniga mo le faamoemoe e pei ona ta‘ua.
O le tausaga 2003, na oo atu i le 135 avanoa sikolasipi sa ofoina e le SSA, ma e tusa ma le $100,000 se vaega tupe o le tau aofai mo le totogi o i latou ia. Ae i sona taunuuga, sa maitauina ai le toatele o i latou sa aoaoina mai ia avanoa, sa maua ni tulaga lelei ma le maualuga, sa ave fu‘a ai mo Niu Sila, mo nisi o taaloga ma falagamaea a le lalolagi.
O taaloga e pei o le lakapi, softball, aau, martial arts, touch faapea siisii mea mamafa, ma isi, sa mafai ona ausia ma faamanuiaina ai le toatele o talavou sa mauaina avanoa sikolasipi mai le SSA.
O se tasi lea o fua mai ma le aogā o lea foi taumafaiga ma lona autū moni, talu ona amata ma faavaeina.
I se lipoti e pei ona faamatuu mai i le pepa o faamatalaga, o loo ta‘ua ai e faapea, o le 2011 o se tausaga ese lea i le toatele o le fuainumera o i latou sa talosaga mo avanoa sikolasipi, talu mai le amataga.
E silia ma le lua sefulu taaloga eseese sa mafai ona talosagaina ma o le aofai foi lea o taaloga o le a agai i ai aoaoga ma ofoina mo talavou ua faamanuiaina i avanoa mai le 2011.
O le finagalo faaalia o le afioga i le Peresitene o le SSA, le susuga ia Papaliitele Peter Fatialofa, sa ia faailoa ai lona fiafia tele ona o le amanaia ma faaaogāina tatau e talavou o avanoa tāua, aemaise ai o le faatupulaia pea o le aofai o i latou ua silafia le auaunaga a le faalapotopotoga, ma galulue faatasi ai.
O le sini foi lea ma le autū moni na mafua ai ona faavae ma faatulaga lea fuafuaga mai lava i lona tau amataina mai.
O suafa o i latou e pei ona faamanuiaina, faapea taaloga ua lautogia ai:
Under 13: Cabriel Faamausili – swimming
Under 15: Bradley Abbey – lakapi liki; Brittany Robertson – gymnastics; Paige Schendelaar-Kemp – e aau
Under 17: Aaliyan Ah Kiong – Basketball; Jeffrey Arona Tuifanae – e aau.
Under 19: Daniel Kayes – waterpolo; Travis Muavae – lakapi liki; Jennifer Fidow – Canoe Sprint; Rishan Po Ching – canoe Sprint; Leesa Lealaisalanoa – afeleti.
O le susuga ia Papaliitele o se sui faavae o le pulega o le faalapotopotoga mai lava i le tausaga 2005, ma o ia o loo avea ma Peresetene i le taimi nei, o le Samoa Sports Association.
E pei ona silafia o se Taitai iloga foi lenei tamalii i le tulaga o taaloga, ma o le ala fiafia foi lea e atina‘e tupulaga talavou o le atunuu, i le tele o taaloga mo le lumanai. O se tasi o sini ma faamoemoe mautu o le SSA, o le saga faalauiloa o le soifua maloloina ma le soifua manuia i le maua lea o le malosi o le tino ona o gaioiga ma taaloga.
Ia faamanatu ma faamanuia i tupulaga ma i latou uma e iai taleni ma agavaa i taaloga, i totonu o Niu Sila, ma ia saga faamalosi ai e atina‘e le manuia e maua mai i taaloga, e avea o ni luitau ma se vaega o tupe maua e fesoasoani ai mo aiga.