Tiute o Tamā ma lo latou aso faapitoa

“O Samoa ua uma ona tofi, na te taitaia pulega lelei”

O le Aso Sa lona lua o le masina o Aukuso i tausaga uma ua faamanatu ma faatāua ai le sao o Tamā uma o Samoa, ma o se aso na mafua ona faia i ai se ioega a le Malo, e ese mai le aso faamanatu faapitoa o Tina, ona o ni lagona na oso a‘e pe aisea ua lē faamanatu ai ma se aso mo Tamā.
O le tausaga nei la, sa faatino ai foi e le Malo se sauniga faapitoa mo lea aso faailogaina ua avea ma se tasi o polokalame i le kalena o fuafuaga a le Malo i tausaga uma.
“O Samoa ua uma ona tofi, na te taitaia pulega lelei”, o le autū lea o lenei tausaga.
Na avea ai le minisita o le Matagaluega o Tina ma Tamaitai, Atina‘e o Nuu ma Afioaga ma Aga Fesootai, le tofa Tolofuaivalelei Falemoe Leiataua e fai ma fofoga o le aso i le saunoaga togia poo le saunoaga autū, ina ua manatu le alii Palemia susuga Tuilaepa L Sailele Malielegaoi, sa ave i ai le saunoaga autū, e fai se suiga ma ia lafo ai le faaaloalo i le minisita o Tina ma Tamaitai. O le saunoaga la a le alii minisita na ia toe faamanatu ai le tāua tele o le sao o tamā uma o le atunuu, ma e lē o se mea e toe tau faailoaina lea tulaga.
Na ona ia faamanatu i le itupa o tamā le tāua o o latou tiute pe a lima taitaiina i pulega lelei e maua ai le maopoopoga o nuu, o aiga aemaise o totonu o ekalesia ma oo atu ai i pulegamalo. O le susuga i le faafeagaiga o le ekalesia Metotisi o Taumafai Komiti sa saunia le sauniga lotu puupuu lea na ia sii mai ai se mau tāua i le Tusi Paia e fai ma ‘au‘au o lana upu timai faakerisiano mo Tamā o Samoa.
O se mau na matuā lagolagoina e le taitai o le Malo i le alii Palemia ina ua maua lona avanoa e faia ai se saunoaga e faaopoopo i le lauga autū o le aso sa saunoa i ai le minisita o le matagaluega o tina ma tamaitai.
“Sa mamao ia te au o le a oo i ai le faatofalaiga i le tusi lea, ona o le tāua tele o le feau o loo molimoli mai ai, ma o le mafuaaga foi lea o le sui faafuasei o kia o le tatou taavale ina ia ou oo mai ii e matuā momoli le faafetai i le alii faifeau ona o le lava tapena.”
“E tāua tele ona o le filifiliga o le feau tāua ua aumai, ia se‘i silasila ia te outou o toeaiina matutua a ia o le atunuu.
O Tootoo au ma Tootoo sinsina, ua leai se isi o toe ai sili, o paia ia o Samoa ua aofaga potopoto mai i le maota nei. Faafetai i le tou talisapaia o le tatou aso faapitoa”.
“O le tāua o le feau ona o lea ua tino ai ii ia Reopoamo le mala, le mala na tauave mai ia Tavita le Tupu. Lea ua faatino tonu a ii afioga a le Atua e pei ona molimoli e Natano le Perofeta. O le mataautia o le agasala na fai e Tavita o le alu i le faletua o Ulia o Patisepa, o Patisepa e lei faamalieina pe faatinoina le feagaiga na osi i luma o le Atua ae totolo i ai Tavita.”
“O le ā la le upu a Natano, o le sala i le maoae o le mea lea, le agasala lea. O le upu a Natano e lē tea le pelu ma oe ma lou aiga. O mea na e faia i le pogisa e faatino e isi i le malamalama, ma o le a vaevaeina lau nofoaiga.
A o le tāua o le mea lea o le lapataiga mo tatou uma, ia aua, aua, aua ona tatou faia le sese lea na fai e Tavita auā ua fai faataaloga e nisi o tamā le mea lea, e matautia le agasala lea”. “O le feau foi o lea ou te fia momoli atua i le Taitai o le Itu agai, ma le Sui taitai o le Itu agai lea o loo alala mai i, o taimi uma lave e fono ai le Palemene ona talanoa mai lea o le toalua lea e pei o upu lea na talanoa ai Reopoamo.
A o le mea lea e faatāua i le asō, o ai ia e alala mai i, o outou o ulu sinasina ma outou ua fai tioata pogisa, tiga ona malamalama ua fai lava tou tioata pogisa.
E ta‘u mai ai iina le matua o lo outou soifua lea e tapatapa i ai i le Malo, ma o lau tou tuualalo lea foi e mafua ai le tusi faalupega lea i le asō.”
“Ou te tatalo e amata atu nei e oo i le faavavau e lē toe lauga le Taitai ma le Sui taitai o le Itu agai, faatape nei komiti, nei toeaiina ua maumau ai tupe a le Malo, lea la ua faaluaina i le tuualalo a le faifeau, Tuilaepa ma le HRPP, fai le mea e lei faia e Reopoamo, ia tapa le fautua a ē matutua, le ala foi lena lea e manuia ai meafai a le tatou Malo. Faafetai i lau susuga i le taitai o le sauniga ua matuā tāua tele lau tapenaga mo lenei aso.”