Sa tulimatai e le Itu agai le tauaofiaga a le Palemene i le masina nei o Tesema e tuuina atu ai se tali a le Malo i le fautuaga a le komiti o ofisa o le Palemene ina ia tuuina atu le taunuuga o suesuega a le suetusi sili a le Malo mo se suesuega tau solitulafono ma faia ni moliaga faasolitulafono. Peitai e na o le lua itula o le fono a le Palemene i le Aso Lua ua mavae atu nei ae toe tolopo i le Aso Lua, 20 o Ianuari o le tausaga fou 2015.
“Sa ou manatu e savali le alii Palemia i lana saunoaga na tali mai ai i le matou fesili poo afea e avatu ai se finagalo o le Malo”. O le finagalo lea o le taitai o le Itu agai le afioga Palusalue Faapo II ina ua fesiligia, ma ia faailoa mai ai o le taimi o fesili ma tali i le tauaofiaga talu ai a le fono aoao na faailoa ane ai e le Palemia, o le fono a le Palemene i le masina nei o Tesema e faatino ai lea tulaga. Peitai o le faanoanoaga lea o Palusalue ona ua foliga mai e lē popole le Malo aemaise le Palemia.
“O i e iloa ai o loo iai se taumafaiga lē lelei ina ia natia faaletonu o loo lipotia mai e le suetusi sili a le Malo”. O ia faaletonu na tagofia e le Palemene ina ua talanoaina le lipoti a le suetusi sili, lea o loo faailoa ai faaletonu i le pulea o tupe ma meatotino a le Malo e nisi o matagaluega ma faalapotopotoga a le Malo.
O le faalapotopotoga o eleele a Samoa le Samoa Land Corporation, sa lipotia ai ni faaletonu ile pulea o tupe ile fausia o le ofisa o le faalapotopotoga i Tuanaimato lea ua tapunia ae tuuina atu e avea ma faletalimalo.
O loo tuuaia ai foi le lē lelei ona pulea nisi o galuega a le faalapotopotoga aemaise o le faatauina mai o se loli vili vai. O le afioga Faumuina Tiatia Liuga sa avea ma minisita o le faalapotopotoga i le taimi na tulai mai ai ia faaletonu o loo ta‘ua i le lipoti a le su’etusi sili.
Na faamavae Faumuina ma le tofi minisita o tupe ina ua vavao finagalo faipule o le itu agai ma nisi o faipule o le itu a le Malo i le leai o se faaiuga a le Palemia e faia. Faaalia e Palusalue o le a faatali i le aso 20 o Ianuari 2015 ma le tauaofiaga a le Palemene o le a toe tauaofia ai pe oo atu ai se finagalo o le Malo.
“O le a iloa ai se isi tulaga e oo i ai le mataupu pe afai o le a leai lava se finagalo o le Malo”. E lei faailoaina e Palusalue i le tusitala poo le ā se gaioiga e ono faatino, ina ua fesiligia.
