E ui ina ua lē toe amanaia e le asosi fusu a Niu Sila se tasi o alo o le atunuu, sa faaigoaina ia Lightning Lupe, peitai e lē aveesea ai le fusi o le siamupini o le au paga Cruiserweight o loo ia umia pea talu mai le tausaga e 2005.
O le faaiuga lē mautinoa ua faia e le asosi a Niu Sila i lea alo o le atunuu, ua manatu ai Lupe, ua tatau loa ona tautau meafaipele e lē toe tagofia.
O le lē fiafia o le alii fusu i le faaiuga a le asosi ua fai ia te ia, ua mafua ai lana faaiuga o le a litaea loa mai le taaloga.
E manatu Lupe e lē sa‘o le faaiuga ua faia ia te ia, lea ua taofia ai ona toe faaauau lana taaloga ma saili nisi o ana fusuaga.
E lē gata ina ua taofia o ia mai le toe taalo, peitai ua faapea foi ona lē mautonu, pe o le a faapefea le fusi o le siamupini o loo ia umia pea.
O le fusi a le Pan Pacifc sa taalo ai Lupe mo Niu Sila, ma se tasi o alo tautaua o Samoa i lena vaitaimi le alii o Sam Leuii.
O le faaiuga sa manumalo ai Lupe o Niu Sila, ma o lea lava la o loo iai pea ia te ia lea fusi sa siamupini ai i le latou au paga le Cruiserweight.
O le molimau a Lupe, na fai le faaiuga a le asosi a Niu Sila e taofia ai ona toe taalo, e faavae i se lipoti sa tuuina mai e Ausetalia, ma ta‘ua ai o ia ua faaletonu lona mafaufau ma ua lē toe agavaa ai ona toe taalo.
O lea lipoti mai Ausetalia sa tauaaoina ane e se tasi o fomai faapitoa sa faia se suesuega mo le alii fusu.
O le vaega tonu lea o loo matuā teena malosi e le susuga ia Lupe, talu ai fai mai a ia e lē sa‘o lea faamatalaga. O le faaiuga foi sa faailoa ane ia te ia, e lei vaai i se faamaoniga, aemaise ai o le toesea o lana faiaoga ina ua maliu, ua atili faamautu ai e le asosi la latou faaiuga.
Sa ta‘ua foi e le alii fusu e faapea, e tolu isi fusuaga sa ia taalo ai ina ua mae‘a ona taofia ia e Niu Sila, o le isi faamaoniga lea, o loo maumaututu ai pea lona taofi, e lē sao ma le faamaonia le mau a le asosi a Niu Sila e uiga i le faamaloloina faamalosi o ia.
O loo iai foi le talitonuga o Lupe, sa tatau lava ona faalauiloa faalauaitele le tulaga ua taofia ai lona tagata, ma fai se faaiuga aloaia o le fusi ma le siamupini o loo ia te ia.
O lona lava manatu afai o le tulaga aloaia lea ua mafua ai ona faamalolo o ia mai le taaloga, e tatau foi la ona fai se faaiuga aloaia, poo le aveese mai o le fusi ma fofogaina le mafuaaga o le lē toe taalo o le siamupini sa umia le fusi.
E ui i lona lea manatu, peitai ua lē ogatusa ma fuafuaga a le asosi fusu a Niu Sila, ma ua foliga mai ai, ua tiai ma tuu faaleiloga ai faapea lona tagata, ma lona taumafai sa tautaua ai foi le igoa o Niu Sila.
Na toe faamanatu mai e Lupe, sa faaaogāina foi lona tagata e le susuga ia Vili, o se tasi o loo faatautaia nisi o fusuaga i Aukilani i Saute. Sa tele foi ina faaaogā lona tagata, e faia ai nisi o faasalalauga faatosina a lea fale fusu, ma sa taalo ai foi. Peitai ane ua te‘i lava ua toe faaselemutu ma lē toe fesootai ane.
E lē gata i lea, ae sa faaaogāina foi ma tāpā lona tagata, mo taaloga ma fusuaga sa faafoeina e le kamupani a le Event Polynesia i Niu Sila lava.
Sa taaalo ma faataunuu ai ana fusuaga, peitai ane ua lē toe mafai foi ona faaauauina lona taumafai, ae lei mautinoa pe o le ā le mafuaaga.
O le ala lea ua lē malamalama ai ma ua nenefu faasoloatoa ai ma lona mafaufau, poo fea le sa‘o o le faaiuga a Niu Sila ua faia mo lona tagata ma lona taumafai.
Sa fesiligia le susuga ia Vili mo sona finagalo, o se tasi o tamafanau a Samoa, sa ia faaaogāina Lightning Lupe mo nisi o ana fusuaga mo se vaitaimi a ua mae‘a ona taofia faaleiloga e Niu Sila le alii taalo.
O le tali a Vili e foliga mai sa lē fiafia foi i le faaiuga a le asosi, ma e na te lagolagoina foi le leai o se faaletonu e pei ona taofi i ai le asosi. E iai foi isi vaega e lei mautinoa lelei i ai Vili e tusa ai ma lana faamatalaga, sa ia ta‘ua foi le nenefu ma le tele o isi tulaga e lē o mautinoa ai faiga a le asosi e faatatau lava ia Lupe.
Ae na pau le tulaga sa manino mai i le saunoaga a Vili, o se tasi o ana tama taalo, ma o loo fai foi ma sui o lana fale taalo, o loo ua iai le fusi lea sa ia Lightning Lupe.
Sa toe fesiligia pea Vili, pe faapefea ona tupu lea tulaga e aunoa ma se taaloga sa tatau ona faia e saili ma lu‘i ai le fusi mai ia Lupe. E lē gata i lea, ae pe aisea foi na lē aveese aloaia mai ai le fusi pe afai sa faamaonia le mafuaaga o le lē toe taalo o Lupe.
O se faiga e tai faapea o loo manatu iai sa tatau ona faia, peitai ua toe saunia le isi fusi fou mo le siamupini, ae o loo nofo pea Lupe ma le siamupini e oo mai i le asō.
E lei toe foi mai le susuga ia Vili, e pei ona sa tāpā ma talosagaina mo se talanoaga faaauau mo lea lava mataupu.
O loo tālia foi la se finagalo faaali o lea foi tamafanau a Samoa, ina ia tau faapupula ai pea le pogisa ma le lē mautinoa o le tulaga ua iai nei le taumafai o si alii o Lupe.
Ae na fesiligia e le Samoa Times le susuga i le alii taalo, poo ai sa feagai ma le faafoeina o lana taleni a o taalo, ma avea o ia ma sui o Niu Sila.
Na ia ta‘ua o le isi lea pogai o le tulaga lē malamalama ua ia faafeagai nei ma le faafiatuli, ona ua maliu le alii Initia Fiti sa faiaoga ma fesoasoani mo ia.
E foliga mai e lē o matuā iai foi se faamaoniga o le mau a le asosi latou ia i le pogai ma le faamaoniga o le latou mau, na mafua ai ona faia le faaiuga, ma taofia ai Lupe mai le toe taalo faipele. O le ala lea na agai ai le Samoa Times, ma taumafai e vailiili le mataupu.
Afai e sa‘o ma faamaoni le mau a Lupe, o lona uiga e tatau lava ona faaoo le mataupu i le tulafono e saili ai, poo fea tonu le sa‘o ma le amiotonu.
Ona ua toe saili le isi fusi mo le siamupini o le paga lava lea sa iai Lupe, a o loo umia pea e le alo o Samoa, le fusi lava lea e tasi sa siamupini ai muamua talu mai le tausaga e 2005.
Sa fesootai le Samoa Times i le asosi fusu a Niu Sila, ma toe sailiili matagi ona o le fia mautinoa tonu o le aano ma le sa‘o o lea mataupu o loo finauina e le alii taalo.
E oo mai i le taimi na lomia ai lenei lipoti, e lei toe maua mai se faamatalaga mai le susuga i le alii failautusi e pei ona tali mai se tasi o sui, ma ta‘ua ai le tagata tonu e maua mai ai le sa‘o ma le tali o le mataupu.
O loo aofia ai i le talosaga sa tuuina i ai i le asosi, le faamatuu mai o le tusi mai le fomai faapitoa a Ausetalia, sa faia le suesuega ma faamaonia ai le mau e faapea, ua faaletonu le mafaufau o le alii taalo, ua mafua ai ona taofia ma faasā ona toe taalo mo le lumanai.
O loo tālia foi faamaumauga o fusuaga uma a Lupe mai le toalua o lē sa avea ma ana faiaoga ma faatonu, talu ai ua maliu lea alii, a o lona toalua e iai le talitonuga o loo iai uma lea faamaumauga, ma tala faasolopito o fusuaga ma taaloga mai lava i le amataga.
E oo mai foi i le taimi o le lipoti, o loo tālia pea le suesuega ma lipoti tusitusia a le fomai faaleaiga, o loo nafa ma le vaaia ma le tausia o le alii taalo.
E ui i lea ae sa faaalia manino lava e le alii fomai, e leai se faamaoniga e mautinoa ai o iai se faaletonu e pei ona ta‘ua e le asosi, peitai o le ala lea o le toe faia o le isi suesuega lona lua, lea la o loo tālia sona tali mai.
O le a faaauau pea ma tulituliloa lea mataupu, poo ai e sa‘o, ae pe tatau foi ona faia se tagi faaletulafono e saili ai aiā tatau ma faaiuga tonu ma le faamaoni, ua aafia ai le taleni ma le taumafai o lenei alo o le atunuu, sa vaai maualuga i ai Niu Sila, peitai ua tiai faafasifa‘i a o ia umia pea le fusi ma le siamupini o taaloga faipele o lana aupaga i taaloga a le Pan Pacific.
