O le solotetee a le SSIG, faasaga i le tulafono LTRA 2008

O le solotetee a le SSIG, faasaga i le tulafono LTRA 2008

A’o taoto le pasiaina e le fono usu a le Palemene o Samoa, o le toe teuteuga o le Tulafono Tau Faaofi o le Tulafono o le Faaliliuina o Fanua Faaleaganu 2017, ua amata ona faaalia e nisi lo latou lagolagoina o lea tulafono fou, ona fai mai e lelei mo tagata uma. E ui ina o loo faapea mai nisi e lē fou le mokesiina o lisi o fanua faaleaganuu, ua leva ona fai e nisi ae lei faatulafonoina e pei ona iai nei le teuteuga o le Faaliliuina o Fanua Faaleaganuu 2017.

I lalo o le Vaega 3 o aiaiga e faaaogā i Mokesi o Lisi o Fanua Faaleaganuu o loo faapea mai lona toe teuteuga, Mokesi o lisi o fanua faaleaganuu:

“Afai o le a mokesiina se lisi o se fanua faaleaganuu o le mokesi, “e lē tatau ona faia, seia vagana ai ua iai faatasi le maliega tusitusia muamua a tagata e ona fanua faaleaganuu ua faamanuiaina ai ma e ao ona faamauina i lalo o le Tualafono o le Faamauina o Fanua 2008.”

E lē gata i lea o loo faapea mai foi “o le faamauina foi e faapea e lē avea lea ma ala e faaee atu ai se aiātatau o le pule e umia ai se fanua faaleaganuu.”

O loo talanoa mai foi le teuteuga lea e faapea, o se mokesi lona lua poo se mokesi e faia mulimuli ane i se lisi o se fanua faaleaganuu, e faasāina, e lē tatau ona faamauina ma afai e faia pe faamauina, ua faalēaogāina.

O loo aiaia foi e faapea, “o se tagata ua mokesiina atu iai o se lisi i se fanua faaleaganuu, e lē tatau ona faia o se gaioiga i le lisi ua mokesiina, seia vagana ua faatagaina le gaioiga i lalo o lenei tulafono poo tulafono faatonutonu ua faia e tusa ai ma le tulafono.”

“E tatau ona totogi muamua soo se tupe totogi o lisi e lei totogia, mai soo se tupe ua toe faaola mai pe a faatino le aiātatau i tulaga faaletonu i lalo o le mokesi. O loo manino mai foi faapea o le tuuina atu o lisi o fanua faaleaganuu i le noatia ma fai fuafua i mokesi, o le tagata ua lisiina atu iai se fanua faaleaganuu lea o loo noatia i se mokesi, e lē tatau ona tuuina atu le lisi seia vagana ua iai faatasi ma le maliega tusitusia muamua a tagata ua faamanuiaina ai i le fanua faaleaganuu.”

O le autu o loo molimoli mai ai le toe teuteuga o le tulafono tau faaofi, o loo faapea mai o teuteuga autu e faasino i mokesi o lisi i fanua faaleaganuu, o le faafaigofieina lea o faagasologa tau mokesi ma faatulaga lelei se aofaiga o tulaga faasāina faaletulafono ma manaoga o le a puipuia ai aiātatau e umia ai le pule, a tagata e ona fanua ma faamanuiaina ai, a’o faapena foi ona aiaia ai ma aiā a tagata o mokesiina atu ma tagata e mokesiina iai.

Saunoa se tasi o sui o le komisi o fanua faaleaganuu le CLAC, o lona aotelega o le tulafono tau faaofi, ua faamoemoe o teuteuga nei e faamalosia ai le faatulagaga o tulafono, ina ia malupuipuia le puipuiga faale-Faavae, e tusa o le faaliliuina o fanua faaleaganuu (o lona uiga o lisi, laisene, ma le mokesiina o lisi o fanua faaleaganuu) ia tausisia ai le Faavae.

O le taunuuga ia siitia ai le tulaga o le soifuaga manuia o tagata, e ala i le uunaia o le faaaogāina o fanua faaleaganuu i tulaga e sili atu i le itu tau tamaoaiga e ala i le lisiina, laiseneina ma le mokesiina o lisi o fanua faaleaganuu.

Fai mai le taofi o le sui o le Komisi o Fanua Faaleaganuu lea na tofia e latou te silasila i le tulaga lea, “o tagata Samoa uma lava o le a manuia ai mai nei teuteuga.” Peitai e lē o le manatu lea ma le silasila a le SSIG. O loo faaauau pea lo latou finauina e faalēaogāina le Tulafono o Fanua Faaleaganuu 2008.