O loo olaola pea le alagaupu i totonu o le afioaga o Paia e faapea, ua leo laititi le Paia, o loo manino ma malamalama lea tala i le atunuu. O le mafuaaga foi lea o le malaga mai o sui e toafā o le ekalesia Katoliko i Paia i Aotearoa nei ona ua leo laititi le Paia ua fia maua se fesoasoani i ana tamafanau o loo alaala ma aumau i Niu Sila nei e ala lea i se fesoasoani seleni se’i toe fausia ai lona malumalu tapuai o loo i Samoa.
Ua tele mafutaga ma polokalame a le pulega ua faatinoina atu i totonu o Paia i lana ekalesia Katoliko ae o le popolega lea ua lē ofi lona falesa e faatinoina ai polokalame o le galuega a le Atua.
O le taoto mai o le manaoga mai Samoa i le Ekalesia Katoliko i Paia i le amataga o le tausaga i alo ma tamafanau o le nuu o loo i Aukilani na amata ai loa ona faamaopoopo e nisi o tama matutu i Aukilani se mafutaga a Paia se’i tali atu ai le valaau mai o le ekalesia. E sefulu matafale sa mafai ona galulue ma faamaopoopoina le mafutaga mai ia Aperila seia oo mai lava i le taimi nei.
O le taeao o le Aso Toonai ua mavae na faia ai loa le po siva poo le sailiga tupe a le mafutaga a Paia i le hall a le ekalesia EFKS Mataniu Feagai ma Leata i Magele, e faamaopoopo ai se seleni auā lona malumalu tapuai i Samoa.
E ui i le toaitiiti o le mafutaga ae sa vaaia lava le agalelei o le Atua i tamafanau o le nuu aemaise o uo ma ē masani sa agalelei atu ma tusia a latou foai auā le malumalu o le Atua.
O le afioga ia Patele Iosefa Euese na ia taitaiina le sauniga lotu i le taeao auā o le lupe faalele foi a le afioaga o loo galue i Aotearoa nei, ona fagasolo loa lea o ipu a aiga taitasi faapea ipu fesoasoani a tagata sa alolofa atu.
O le tofa ia Feo Seko sa fai ma fofoga o le aso ae o le sui mai Samoa le tofa ia Afaese Muliaga sa tu tootoo i le taimi o faaaloaloga ma o ia foi sa momoliina le agaga faafetai i le paia o le auvalaaulia sa afifio atu ma tuu atu lo latou tauau i le faamoemoe o le ekalesia mai Samoa.
O le afioga ia Toleafoa Taliaoa ma le afioga ia Peseta Telea sa faamaumauina le aao mafola o le auvalaaulia.
E $1,000.00 le ipu faavae a le matafale ae sa le tuua ai lava le fia tautua ma le soifua galulue o aiga o le mafutaga na faasili atu ai i luga ma le tai afe tala le ipu a le aiga, ona o le naunau o tagata ia tu le malu o le Atua i Samoa.
O le manatu maualuga foi o tagata i lea aso o le tagata ma lona faasinomaga o le tagata foi ma lona tupuaga ma o le ala lea ua tuu atoa iai loto o tagata ona o le agaga moni lea o le Isaraelu moni, poo fea lava e iai e susue lava lona faamalama ma toe vaavaai i lona faasinomaga.
E $45,000.00 le aao mafola o le mafutaga ma aiga sa tauaaoina i lea aso ma o se tupe tele lea seleni ua mauaina, auā pe a faatusa i le toalaititi o aiga o le mafutaga ae o lea ua latou taulimaina lea tupe tele.
E toalaititi matafale ae tetelē fatu o tagata, ma ua lē leo laititi le Paia ae ua leotele le Paia ona e fai i le fatu le galuega.
Ua mae’a nei ona tuuina atu le seleni a le mafutaga i le faletupe e teu ai, ae se’i toe fai nisi sailiga a le mafutaga mo se isi tupe faaopoopo auā lava le malumalu o le Atua i Samoa.
