“O i latou na sosola e aunoa ma le iloa e le auvaa”
Papalii Willie Nansen
Ua sauni le pulega o le Faalapotopotoga o Vaa a Samoa e fofola lo la fala ma le vaega o le pulega o le gataifale o Amerika le US Coast Guard ma faailoa i ai le tetee a le faalapotopotoga i le latou faaiuga ua solitulafono le vaa o le Fotu o Samoa i le ave o pasese, ae sa mafua ona togipau e le Malo o Amerika Samoa o le lauina o uta mai Tutuila mo Manu‘a.
Ua maea ona suesue e le faalapotopotoga o vaa le kapeteni ma le auvaa ma ua faaalia ai e le Pule Sili, Susuga Papalii Willie Nansen, e lei silafia e le auvaa tagata na malaga faatasi ma latou.
O loo iai masalosaloga o le auvaa o le taimi a o taula le Fotu o Samoa i le uafu i Tutuila mo le lauina o uta, o le taimi lea na saofia ai ma tagata na malaga i le lalafi i luga o le vaa. Faaalia e se ofisa sinia o le faalapotopotoga e masani lava, a lau le uta mo Manu‘a, o tagata lava e ana ia faamomoli ma uta latou te lauina ma teu i luga o le vaa, ma atonu o le avanoa lea na lalafi ai loa i se vaipanoa o le vaa e aunoa ma le iloaina e le kapeteni ma le auvaa.
Na faaalia e Papalii Willie na faatoa iloa o loo iai tagata ese i luga o le vaa, ina ua valaau ane le Coast Guard e mafua ina ua logo e se tasi o tagata sa malaga i le vaa lona aiga i Tutuila e ta‘u i ai o ia ua alu i Manu‘a ina ua popole i le faaletonu o le tau a o malaga le Fotu o Samoa.
Na logoina loa e le aiga le vaega o pulega o vaa a Amerika Samoa, e pei ona faaalia e le alii Pule Sili, ma mafua ai loa ona iloa e le Coast Guard.
E taunuu le vaa i Manu‘a ua faatali mai leoleo mo le aveina o tagata e faapea o le pasese e toa sefulu, i le potu taofia sei suesue ai pe na faapefea ona malaga i le vaa.
Na faia suesuega a le Coast Guard ma iloa ai e lamatia le saogalemu o tagata malaga i le Fotu ona e faaletonu vaega manaomia e pei o ofu ma vaa faaola e le lava.
O le mafuaaga lea o le faaiuga e faasalaina le vaa, ae o le faamatalaga a le pule o le Coast Guard e le faasaina le lauina o ni pasese sei vagana o loo lelei vaega uma o le saogalemu o tagata malaga e tusa ma tulafono o femalagaiga i luga o le sami a le Malo tele o Amerika o loo faamamaluina foi e le teritori o Amerika Samoa.
Ua valoia le oo i le faamasinoga a le teritori o le mataupu lenei e saga suesue atili ai, pe afai e le masuiga malie i le va o le Coast Guard ma le pulega o le faalapotopotoga o vaa a Samoa.
O le lua ai lea o vaa a le faalapotopotoga ua faasalaina i Amerika Samoa. Peitai o le salatupe e $20,000 tupe Amerika a le vaa o le Lady Naomi i lona ave o se au lakapi e aunoa ma ni pemita ulufale i le teritori, ua toe faatonuina e le Faamasinoga Maualuga a Amerika Samoa e toe faafoi i le faalapotopotoga o vaa a Samoa, ona e lei solia e le vaa se tulafono.
Sa taunuu le vaa ma le aulakapi peitai e lei o ese ma le vaa o le Lady Naomi, ae sa toe malaga mai ai lava i Upolu lea na faatoa toe malaga ile taamilosaga lakapi o le Mossoi a Tutuila ina ua maua o latou pemita ulufale.
