E iai le ava fatafatafa i tu ma aganuu a Samoa e ave ai le tuualalo a se matai i se alii Sili o se afioaga mo lana faautautaga i se tulaga ua aafia ai le nofo lelei o tagata, ma o le aganuu lea na faatino e alii ma faipule o le nuu o Papa na savalia le afioga Le Tagaloa Pita ina ia tatala i tua lana tagi.
Faaalia e le Palemia, Susuga Tuilaepa L Sailele Malielegaoi, e lē sa‘o se finagalo o Le Tagaloa na faaalia i tusitala na ta‘ua ai o le sāvali na oo atu ia te ia, o se taumafaiga a le Malo.
O le finagalo o le Palemia o lana tali lea i le lafoga na faia e le afioga i le Papa, ma na faaalia e Tuilaepa, e soo se nuu ma se afioaga o le atunuu e iai tulaga masani ia, o le ave o se tuualalo a matai i se matai Sa‘o o se afioaga pe a iai ni mataupu e tatau ona soalaupule i se auala faatamalii.
O le mae‘a ona feiloai o le sāvali i le afioga Le Tagaloa Pita, na afea ai foi ma le maota o le faipule o Palauli le Falefa le afioga Faumuina Tiatia Liuga. O se feiloaiga na faaalia ai e le faipule lona nofo sauni e tuuina atu lana finauga i le faamasinoga e tusa ai o le tagi ua faasagasaga atu ia te ia ma e lē o popole foi i ai.
O le feiloaiga foi lea na faailoa ai se lagona ootia ma le alofa o le faipule i le sāvali a lona itumalo, ma ia faaalia ai e alofa i molimau ua sauni e lagolago le tagi a Le Tagaloa ina ne‘i faasalaina ai ma latou i le falepuipui, pe a faamaonia ni ana tuuaiga faasaga i le itu tagi.
O aiaiga fou o le tulafono o faiga palota o loo mafai ona faasala ai i le falepuipui se sui e taulamua i se tagi o faatosina ma gaioiga faaalatua i le palota faapea ana molimau, pe a iai ni tuuaiga faasaga i le itu tagi e faamaonia. Ua aiaia foi le sainia o se tautinoga e le sui e faauluina se tagi faatasi ai ma ana molimau ina ia faailoa ai le leai o ni faiga solitulafono na latou faia.
O le faasalaga falepuipui pe a alu alu ae iai ni tuuaiga e faamaonia, e mafua mai i le tautinoga o le a sainia auā o le faitotoa lea i le moliaga o le tauto pepelo.
