Ua teena e le tofi Pulenuu o le afioaga o Mulivai Safata, le tulaga o le fausia ai o le atinae tele lea ua faalauiloa mai e le Malo, o le maota talimalo tele o le a fausia e le kamupani mai Saina, le ETG, e faafoe ai fale mo taaloga casino e pei ona faalauiloa ma tuuina atu e le Malo le laisene i lenei kamupani, faapea le isi laisene mo se tasi kamupani o le faletalimalo o Aggie Grey’s Resort i Mulifanua.
Na faaalia e le afioga i le Pulenuu o le afioaga o Mulivai Safata, susuga Tafa Aukusitino, e lei faailoa atu i le latou afioaga poo le itumalo foi lea fuafuaga a le Malo. Sa ia faailoa, atonu o le a tele nisi o galuega e maua mai ai, peitai e lei iloa e le latou afioaga ni tulaga e pei ona tulai mai.
O le taimi muamua na ia iloa ai lea fuafuaga, ina ua maimoa atu i le TV i le faaiuga o le vaiaso, ma ia iloa ai le faasalalauga a le taitai o le Malo, le afioga i le Palemia, Susuga Tuilaepa Lupesoliai Sailele Malielegaoi.
O le agaga faanoanoa lea o le alii pulenuu ia Tafa Aukusitino, e pei ona ia saunoa ai e faasino i le Malo, ona na ia ta‘ua, e lē o iloa tonu poo fea o le a fausia ai le 500 o eka o fanua lea ua faailoa mai e le Malo o le a faatuina ai lenei atinae tele, lea faapea e oo atu i le 500 potu ma le lata i le 100 masini taaalo casino o le a fausia ai. Atonu o se tulaga lelei mo galuega mo le itumalo ma le afioaga, ae na ia faaalia sa tatau lava ona faailoa muamua atu ia i latou lea faamoemoe. O le masina o Iuni, pe afai e faagasolo le tulaga o faatalanoaga i lona tulaga lelei, o le a fausia ai loa lenei atinae tele mo le umi e 2 tausaga.
O le tuuina atu o laisene e lua e le pulega o taaloga o petipetiga a Samoa i le faletalimalo o Aggie Grey’s Resort ma le kamupani o le ETG (Exhibition Tourism Group) mai Saina e faafoe ai fale o taaloga Casino i le atunuu, na faailoa ai i faalauiloaga a le Malo, le avea o le afioaga o Mulivai i Safata ma nofoaga ua filifilia e le kamupani mai Saina e faatu ai le latou pisinisi o se faletalimalo e iai ma le casino.
O le taeao la ananafi i talafou mai Samoa na faalauiloa ai le saunoaga lea a le tofi pulenuu o le afioaaga o Mulivai Safata, peitai o loo lipotia e se tasi o nusipepa i Samoa o loo ia faailoa ai le iai o se feiloaiga na faia e sui o lea kamupani ma matai o Mulivai Safata, ma ua fausia ai loa se maliega i le va o itu e lua.
E tusa ma le lima selau eka le tele o se eleele poo se fanua i Mulivai Safata na ta‘ua i lea lipoti o le a faaaogā mo le atinae tele ma o Iuni o le tausaga nei e pei ona faaalia e le palemia o loo fuafua le ETG mai Saina e amata ai ona faatino le galuega.
Ua mae‘a ona faailoa e le kamupani i se asiasiga muamua i Samoa a le faauluuluga o le kamupani le telē o le faletalimalo o le a fausia, lea e faapea e maua lava le luaselau o potu e nonofo ma faamautu ai tagata tafafao mai fafo.
Ua faaailoa ai foi e le Palemia le avea o lea atinae ma avanoa lelei o le a maua ai galuega e tele mo tupulaga ma tagata o Mulivai faapea nuu tuaoi o lea vaega o Upolu.
E lei toe maua la se faaaliga mai le Malo poo le kamupani foi a le ETG e tusa ai o lenei finagalo o le pulenuu o Mulivai Safata, ua agiga i luga o talafou mai Samoa.
O loo tetee lava ekalesia i Samoa i le faia o ia ituaiga o fale mo taaloga faitupe, ae peitai e lei avea le malosi o lea tetee faapea foi ni tetee a nisi o le atunuu e aofia ai ma ni faalapotopotoga tumaoti, e faia‘ina ai le fuafuaga a le malo, auā ua mae‘a ona pasia e le Palemene se tulafono e faasino i le faagaioia o fale casino i Samoa.
O le tulafono foi lea ua aiaia ai e na o tagata e umia tusifolau o isi atunuu e faataga ona ulufale i casino, ae o tagata Samoa e le faatagaina.
O loo mafai foi ona taaalo ai tagata Samoa o loo umia tusifolau o tagatanuu o isi atunuu e pei o o tatou tagata ua maua sitiseni i Amerika, Niu Sila ma Ausetalia.
O se tasi lenei o atinae tau tagata tafafao ua folafola e le Malo o le a pito tele tupe e maua
ai ma fesoasoani malosi ai i le tamaoaiga
o le atunuu.
