“E leai se isi e mu fua ae lē totogia le eletise”
Ua saunoa le Palemia ma ia faailoa le mae‘a o se latou feiloaiga ma alii ma faipule o le nuu o Magiagi i le mataupu ua fai si umi ma tele tausaga e lei maua se taotoga filemu, o le totogiina lea o pili o eletise o le nuu o loo maua le eletise ae e lē o toe totogia talu mai le tausaga e 1998.
O le tausaga lea na faasā ai e Magiagi ona toe afea e ni fuamita a le EPC o latou laoa ma maota e fua a latou pili, pe a lē talia e le faalapotopotoglocation? a o le eletise le EPC le latou talosaga na ave i ai i lea vaitaimi, ia faapa‘ū le totogi o le iunite o le eletise mo latou e avea ma taui o latou eleele o loo faatuina ai le afi eletise e maua i le suavai.
O le finagalo o le Palemia i lana polokalame tai vaiaso ma se tasi o leitio i Samoa na ia faaalia ai, e leai se isi e tatau ona mu fua i le eletise ae lē totogia. O Magiagi ua faaalia e se molimau e lei faamaonia, ua oo i le $20 miliona aitalafu o ana pili eletise i le 14 lenei o tausaga o mumū fua.
O le masina fou o Aukuso ua faailoa e le taitai o le Malo i le latou feiloaiga ma alii ma faipule e tatau ona oo atu i ai (faaiuga o le masina) ua soo atoa aiga o le nuu i le mita o le eletise e totogi muamua le cashpower meter.
O le tuutuuga o lea fuafuaga o le taofi o le auaunaga a le eletise e lē toe maua e le nuu pe a lē logosaia le faaiuga ua iai a le Malo.
“O le faaaliga mai lena a le alii Palemia i le matou feiloaiga”, na saunoa mai ai le Pulenuu le susuga Tuiono Uni i le tusitala.
Faaalia foi e le pulenuu o le lagona o le nuu e lē talia le tuualalo ua avatu e le taitai o le Malo, seiloga ua maua se tali o le taui o o latou eleele o loo tu ai le afi eletise. E le o mafai ona faamautu mai e le pulenuu pe fia le aofaiga o eka o eleele o loo iai lea atinae a le Malo, ae o le itu mautinoa o loo feinu ma taumamafa foi le afioaga i le suavai paipa mai vaitafe o loo maua ai le suavai o le afi eletise e leai se totogi.
Faaalia e se sui o le nuu o le tulaga lea ua leva ona iai e inu fua le nuu i le suavai paipa e lē totogia, ona o le suavai e lei faamamāina (untreated water).
Ua maua e le nuu ua mae‘a ona toso e le EPC se laina eletise e fesootai ma laina o loo ola atu ai le uila i o latou maota ma laoa, ma o le talitonuga o le afioaga o se laina eletise fou e manatu o le a mafai ai ona momotu ese le auaunaga ma lo latou nuu pe afai e lē usitaia le fuafuaga a le malo ua faailoa i ai.
