I le vevela ai o felafolafoaiga ma finagalo eseese foi e faaalia i le mataupu e pei ona maua mai ai tala mai Samoa e faatatau i le tamaitai loia i Niu Sila nei, ua asia ai e le Samoa Times le ofisa o le tamaitai loia i Aukilani nei i sana faamatalaga i lea mataupu. O le lipoti lata mai mai Samoa i sui o le nusipepa i le atunuu o loo faaalia ai le suesueina i le taimi nei e le asosi loia a Samoa amioga a le tamaitai loia o Olinda Woodroffe sa faia i Samoa e tusa ai ma le mataupu e aafia ai le matagaluega a le Justice poo le faamasinoga. O lipoti e pei ona faasalalauina i le taimi ua sola e taua ai le iai o tuuaiga ua faia faasaga ia Leuluaialii Olinda Woodroffe. O le mataupu lea na fesiligia ai le tamaitai loia pe moni ua iai nei ni tuuaiga ae pe talafeagai foi.
Saunoa Leuluaialii o le taimi nei ua maea ona tusi iai le Queen’s council i le matagaluega o faamasinoga i Samoa. Peitai na faaalia e Woodroffe o loo tatala le avanoa e aumai ai tuuaiga ma e oo mai i le taimi nei e lei oo atu lava se tusi o lenei mataupu e taua ai ni ona moliaga. Faaalia e le tamaitai loia “e le fefe i se tagata na’o le Atua”. E na te le’i silafia foi se mataupu faapea sei vagana ai le fesootai ane o se tasi o tusitala mai Samoa e ala i le imeli. O le tusi na taunuu ane i le loia i le vaiaso na tea nei mai Samoa o loo taua ai e toafa loia o loo faasea ai tagata ae e foliga mai e na’o Leuluaialii na alu i le pepa poo faasalalauga foi. Fesiligia Olinda pe moni sa ia lafo ni upu masoa i ni tagata faigaluega o le matagaluega o faamasinoga, peitai na ia tali mai e faapea ” Sa iai la’u tama teine lea e loia i le taimi na tupu ai lea faalavelave mae ou te lei lafo se upu faapea ona e le masani ai ona ou palauvale”. Na pau le tulaga na faamatala mai e le tamaitai loia o le siisii lea o lona leo ae lei faia se upu masoa.
O leisi itu na faanoanoa ai Leuluaialii o tofiga o le komiti a le sosaiete a loia e pei ona tofia e iloiloina lenei mataupu lea e aofia ai ma se tasi o le aiga o le loia sili. O lea mataupu na ia finauina foi e le tatau ona faia lea tofiga ona o loo iai se feteenaiga e tusa ai ma aiaiga o mataupu faapea aemaise foi le faatinoina o galuega. Talia se tala mai le sosaiete o loia i lenei mataupu.
