Ua faapafala le faaiuga a le faamasinoga e aunoa ma le faamaonia o se moliaga faasolitulafono o le tamaitai loia o Iuni Sapolu, i le maea ona faamaonia o ona moliaga e lua, e aofia ai le faalavelave i tiute o leoleo, ma le lafo o upu masoa ma upu taufaifai i le Pulenuu o Vaiala le tofa Fainuulelei Hawaii Lavea. Peitai ua teena e le tamaitai loia le faaiuga a le faamasinoga ma lana faamatalaga i tusitala o le a ia toe apili le iuga. “Well e le fetaui le faaiuga ua faamaonia ai ou moliaga e ui ua discharge without conviction, ona na loka au e leoleo ae leai se pepa faataga poo se search warrant na o atu ma latou e sue ai lo matou fanua”, o le faamatalaga lea a Iuni. E foliga mai i le tulafono e saoloto leoleo e fai a latou suesuega i fale ma fanua o tagata, ma e tatau ona faia se lui i le tulafono e pei ona saunoa ai lava Iuni i se vaega o tusitala na lipotia le taunuuga o ona moliaga i le faamasinoga faaitumalo.
O le faaiuga a le alii faamasino o Vaepule Vaemoa Vaai, ua ia faataua ai vaega lelei uma agai i le ua molia sa laga atu i le lipoti a le ofisa faanofo vaavaaia. E ono ni vaega sa silasila i ai le faamasinoga e avea ma itu lelei o Iuni Sapolu i le mataupu, e pei o le faatoa molia lea i se solitulafono ae ua 55 tausaga o lona soifua, faapea mafatiaga na oo ia te ia ina ua loka e leoleo. E faasino lea i le gaioiga a leoleo na faia i le ofisa autu i Apia ina ua avane i ai le ua molia i le tuanai o le po na loka ai i Tafaigata, lea na faamatala Iuni sa faatonuina ai o ia e leoleo e talai ona lavalava. O se taumafaiga le talafeagai lea i le silasila a le faamasinoga ona ua afaina ai aia tatau faaletagata soifua a le tamaitai loia. Sa finauina e Iuni lea gaioiga a leoleo ina ua faia sana faamatalaga i luma o le faamasinoga ma o se isi lea vaega o le apili o le a ia tuuina atu i le faamasinoga.
O se tasi o tulaga sa silasila i ai le faamasinoga e avea o se lelei mo le ua molia, o lipoti na faasalalauina e nusipepa, televise, ma leitio agai i le pueina ma le molia o Iuni e leoleo. Faaalia e le alii faamasino o Vaepule, ua lava ma totoe lea e fai ma faasalaga o le tamaitai loia aua ua masiasi ai faatasi ma lona aiga. O Iuni o se tasi o loia sinia o loo galue i le faamasinoga maualuga i Niu Sila faapea ma Samoa, ma o se tagata e loto fesoasoani e le gata o tagata Samoa ae o tagata o le Pasefika i Niu Sila, e pei ona molimauina e nisi sa tuuina atu a latou mau e lagolago ai itu lelei mo le ua molia. Peitai na faaalia e Vaepule e le aveesea ai le matuia o solitulafono na ia faia, aemaise o lona faalavelaveina o galuega a leoleo. Faaalia foi e le alii faamasino o le suesueina o le fanua o le tamaitai loia ma lona aiga i se sailiga na maua ai ni laau maruana, o loo avanoa i lalo o tulafono ona faia e aunoa ma se pepa faataga poo se search warrant pe afai o se tulaga faanatinati o loo manaomia ai e leoleo se gaioiga faapea.
Tatau ona tutusa tagata uma
O le faapafala o le faaiuga ae aunoa ma se solitulafono a Iuni Sapolu, o loo tetee i ai le na molia i lana saunoaga i le tusitala o lenei nusipepa, e tatau ona tutusa uma tagata i lea faaiuga a le faamasinoga e pei ona aiaia i le vaega 104 o le Tulafono o Soligatulafono. Fai mai Iuni e toatele tagata ua faasalaina i le falepuipui sa tatau ona faia i ai lea faaiuga, peitai o le a saga finauina lea vaega o le tulafono pe a tuuina atu lana talosaga e toe iloilo ai le faaiuga ua faia. O Iuni ua faaipoipo ma e toafitu ona alo e pei ona faaalia i faamaumauga a le faamasinoga.
