O loo teena e le alii e suafa ia Junior Pritchard o Vaigaga lona moliaga o le taumafai e faaoo le oti. O se mataupu na tulai mai i le amataga o lenei tausaga i le pamu penisini i Vailoa lea na faatino ai e lea alii lenei solitulafono.
O le pamu penisini lenei i Vailoa lea na tulai mai ai lenei mataupu i le aso 3 o Aperila o le tausaga nei. I le folasaga a le itu a leoleo i le asō, Aso Gafua, 21 Iulai na ta‘ua ai e le alii loia o Fetu Lagaaia, o Junior Pritchard sa agai e utu lana taavale i lenei pamu penisini, ma na tulai mai se feeseeseaiga ma se tasi o tama faigaluega, lea na amata ai loa lea mataupu.
E faapea i le folasaga a le itu a leoleo, o se fana sa umia e lē o loo molia nei, lea na ia taumafai ai e faaoo le oti i ē na aafia i lenei mataupu. E toalua ni alii o loo aafia i lenei mataupu ma e tausoga i laua.
Ina ua mae‘a se fusuaga na tulai mai i lenei nofoaga sa lafoina ai loa e le alii o Junior ni upu faamata‘u ma agai ese ai loa lana taavale ma lenei nofoaga. I le lima minute na tuanai ae toe vaaia loa lenei alii ua agai atu ma taumafai loa e faaoo le oti ia i laua o loo aafia, e faaaogā ai se fana, pau le itu lelei e lei aafia ai se soifua i lenei vevesi. Mo le silafia e 13 moliaga faasaga i lenei alii, ae i taualumaga a le faamasinoga i le asō lea na faaiu ai i tua moliaga e 4 faasaga ia Junior. O nisi o moliaga o le a valaauina i luma o le faamasinoga faaitumalo seia vaganā ai le moliaga o le taumafai e faaoo le oti lea na faagasolo i le asō.
Na auai foi i le asō le Vasega o Faatonu e faafofoga foi i molimau auā se fautuaga e tuu atu i le alii faamasino o Lesatele Rapi Vaai mo lenei mataupu. Sa talosaga le itu a leoleo i le vasega o faatonu ina ia sa‘o ma tonu a latou faaiuga o le a faia ina ia maua se faaiuga tonu ma le sa‘o o lenei mataupu.
Sa saunoa le alii faamasino, o le vasega o faatonu lava ia ua na o le faafofoga i molimau o le a tulai mo lea mataupu, ae o le solitulafono o le a taoto lava i le faamasino. Na tuua e tala fou le faamasinoga o loo fofogaina molimau a le itu a leoleo.
