O se tagata muamua lenei ua faaali lona tetee i le Malo i le faia o se gaioiga faapea – o faamatalaga nei na faalauiloa solo ina ua maua e le toatele lipoti o le sasae ma le susunu o le fu‘a o le atunuu.
O se gaioiga ua lagalagā ai foi le tele o faamatalaga ma tuuaiga faasaga i le Malo o Samoa.
O ni tusitusiga ua fesiligia ai le uiga o lenei gaioiga, ona o lea e sauni Samoa e faamanatu le 50 o tausaga o lona tutoatasi, o le 50 foi lea o tausaga o le tagavai lenei o le atunuu ae o lea ua susunu ma taumafai se tasi e faaleaga.
Ua tuu atu i le aso Muamua (1) o Aukuso le iloiloga o le faamasinoga o le alii mai i Mulivai Safata, lea ua avea ma uluai tagata Samoa ua molia i le taumafai e faaleaga meatotino a le Malo le Fu‘a o Samoa.
O le fu‘a lea e sisi i luma ane o le Maota o le Malo, Fiame Mataafa Faumuina Mulinuu II lea ua tuuaia le alii lenei i lona taumafai e faaleaga.
O le moliaga o le faaoolima na mafua ona o se fusuaga na tulai mai ai i lea gaioiga.
O le alii e galue i le nusipepa o le Savali lea ua faia le tagi faasaga i le alii lenei. O le loia ua tulai mo Taatuai Tapuaiga Paepae o le afioga lea ia Leuluaialii Tasi Malifa.
Ua teena uma e Taatuai Tapuaiga moliaga nei e lua ua faia e leoleo faasaga ia te ia e pei la ona iai nei le aso ua atofa mo le iloiloga o lenei mataupu.
O le faamatalaga na maua mai i le vaiaso na tulai mai ai lenei mataupu, ua fiu lenei alii e agai i le Ofisa o le Palemia e saili se avanoa e feiloai ai i le Taitai o le Atunuu.
O le tali na ia ta‘ua e avane pea ia te ia o le itu lea e le o avanoa le alii Palemia. O le aso tonu lea na tulai mai ai moliaga nei, na faaalia ai e le alii faigaluega o le nusipepa o le Savali lea na taumafai e aveese le fu‘a mai i lenei alii, e vaai mai ma se tasi o alii faasalalau sa i le nofoaga e iai taavale o le fale o le malo, ua savali atu le ua tuuaia ma agai sa‘o lava i luma o le Maota o le Malo.
E lei amanaia lava ana gaioiga ae e vaai atu alii nei ua toso i lalo le fu‘a, ma o le aveesega o le fu‘a ma ua sasae ma amata ona susunu, oso atu loa le alii lea o le Savali ma tauivi ma lenei alii ina ia aveese le fu‘a.
Na mafai ona aveese ina ua agai ane ma leoleo o le Maota o le Malo peitai e aveese lava ua masae le fu‘a ma ua iai ma se vaega ua susunuina.
E ui o lea ua tetee nei lē ua molia i lea tuuaiga ma le tagi faaopoopo o le faaoolima i le alii lea o le Savali.
O loo tuufesili pea le toatele poo le a le ‘misiona’ lea na ta‘ua e lenei alii ina ua tauivi ma le alii o le Savali, o loo fia ta‘u i le Palemia o Samoa.
O faamatalaga nei na ta‘ua e Adolf na tomumu ane ai lava lenei alii, ae na ta‘ua foi e Leoleo ua fiu e faasufi pe aisea lava ua faia ai lenei faiga i le fu‘a o le atunuu, ae e leai lava se faamatalaga na mamulu ane.
Atonu o le aso muamua o Aukuso o le a iloa ai loa poo le a lava le mafuaaga o le inaina o lenei alii aua o lea na te teena moliaga nei e lua faasaga ia te ia.
