O Tesema o le tausaga ua mavae 2010 na amata ai ona masani Vaamu Ioane ma Vaioleti Collins, ina ua avea i laua ma sui o le komiti a se tasi o sui tauva o le a le itumalo o Faleata i Sasae. O le vaitau lea ua lata i le faigapalota tele a le atunuu na faia ia Mati o le tausaga nei.
O le mafutaga lea i le komiti a le sui tauva na faaalia e Vaamu i lana molimau, na amata ai ona ia iloa e iai ni mafatiaga o feagai ma Vaioleti i le la mafutaga ma lona toalua faaipoipo.
Na faamatala Vaamu i lana molimau e faapea o se tasi o po na latou tafafao ai i le fale kalapu o le Tropicana, ae na oo atu ai le toalua faaipoipo o le tamaitai ma fasi faamo‘amo‘a. Le fasiga lea na oso ai ma ia e pupulu ona ua alofa i le tamaitai o Vaioleti ae na peitai na fufusu ai ma le toalua o le tamaitai.
O le feeseeseaiga lea na faaalia e Vaamu na faasala ai ma ia e lo latou nuu o Vaimoso, ma fai ai lana tala o le fofo o le faafitauli o le nonofo loa ma Vaioleti. O loo molia i laua i le faia o ni aiatalafu i ni auala taufaasese ma taufaavalea. O moliaga e mafua i ni pili o faletalimalo e tolu sa nonofo ai, ae ua lē totogia.
E faapea foi i pili o ni taavale totogi poo rental cars sa la faaaogāina. O loo tumau le tetee a i laua i moliaga aemaise lava le tetee o Vaamu ona o lana molimau, o gaioiga uma ma feuiuiaiga i le nonofo ai i le faletalimalo o le Outrigger, le Seaside Inn, ma le Satuiatua Beach Fales i Savaii.
O Vaamu ua 52 tausaga o lona soifua ma ua luasefulu tausaga o aumau i Niu Sila ma Ausetalia. Na talosaga mai i se avanoa faigaluega sinia i le Matagaluega o Punaoa Faalenatura ma le Siosiomaga ona e iai ona faailoga maualuluga i le fua fanua.
O le galuega lea na ia maua ma malaga mai ai loa i Samoa ae nonofo pea i fafo lona toalua faaipoipo ma lana fanau. Na ia tautino i lana molimau lona faamaasiasiina o lona tagata, o lona aiga ma lona nuu, ina ua faasalalau i luga o leitio, televise ma nusipepa i Samoa le sailia o i laua ona o pili o faletalimalo ma taavale totogi na la faaaogāina ae lē totogia.
Na tutulu Vaamu a o faia lana molimau, ma ia faamatala lona naunau e fai se galuega faufautua i le tamaitai o Vaioleti ona o mafatiaga sa ia molimauina o loo aafia ai i lona va ma lona toalua faaipoipo.
O le faletalimalo o le Seaside Inn i Matautu-tai, e tolu vaiaso o nonofo ai. Peitai o lana molimau, e leai ma se mea e tasi o pili na lē totogia sa ia silafia ona o lona faatuatuaga atoa na ave i le tamaitai. O taimi uma foi e taumafai ai e fesoasoani i feuiuiaiga ae tasi lava le tala a Vaioleti e faitalia lava ia.
O lana molimau foi na ia faailoa ai e faapea o lana vaai i Vaioleti o se tagata e le popole lava i se mea. Na fua lea vaega o lana molimau tuufofoga ina ua logoina o ia i le lē totogia o pili, ae fai atu i le tamaitai e lē popole ane lava.
O le mae‘a ona nonofo i faletalimalo i Upolu na malaga ai ma faamautu i le faletalimalo o le Satuiatua Beach Fales. Tasi lea o pisinisi na faato‘ai i leoleo le latou tagi faasaga ia i laua.
O le aotelega o le molimau a Vaamu na ia ta‘ua ai o lona toalua faaipoipo ma lana fanau na fesoasoani e totogi nisi o pili. O loo faatalia nei se faaiuga a le faamasinoga i lenei mataupu i le aso 19 o le masina o Aukuso.
