Tete’e le faamasino sinia, sa fa’aoolima i lona to’alua

O le aso 21 o Iulai o le tausaga nei 2009 o le a toe fofoga ai i le fa’aamasinoga fa’aitumalo i Apia le moliaga o le fa’ao’olima (assault) o lo’o molia ai e leoleo se tasi o fa’amasino sinia. O le aso Lua 14 o Aperila 2009 na ulua’i vala’auina ai le mataupu ma tuuina atu ai e le tamaitai loia o Ruby Drake le tali tete’e a le fa’amasino ile moliaga.O lo’o iai le poloa’iga a le fa’amasinoga e taofia ona fa’asalalau fa’alaua’itele le igoa o le alii fa’amasino o loo tu’ua’ia.
I fa’amaumauga a leoleo o lo’o ta’ua ai e fa’apea o Novema o le tausaga ua mavae 2008 na tula’i mai se fe’ese’esea’iga i le va o le ua molia ma lona faletua, e mafua i se fete’ena’iga na a’afia ai le faletua ma se isi tagata sa o latou fai’aiga o le aoauli (lunch) ise tasi o faleaiga i le taulaga i Apia ise aoauli o se aso To’ona’i. O le fete’ena’iga na mafua i tala felafoa’i lea e fa’apea na lafo ai ni upu masoa a se alii papalagi i le faletua o le faamasino, ma le mafai ai ona taofi le to’atama’i o le tamaita’i ma ia asuina ai loa foliga o lea alii i lana ipu uaina.
Na tula’i ese le o lo’o molia ma aga’i loa i le fale, ae fa’ato’a o’o atu ai lona faletua o lo’o matamata lana TV. O le nofoaga tonu lea na vevesi ai le ulugalii ma mafua ai ona faaulu le tagi e le to’alua o le faamasino ona e fa’apea na fa’ao’olima lona to’alua ia te ia. O le mataupu lenei sa taumafai atu ai mo se fa’amatalaga mai le Komesina o Leoleo ma le Loia Sili a le Malo ona o la’ua o lo’o gafa ma le mataupu. Peitai e lei fia tali mai le Loia Sili, seia o’o ina vala’au le moliaga e lei aumaia lava sona finagalo.
O loo fa’aauau pea ona galue le alii fa’amasino i ona tiute masani. Ae sa fesiligia se tasi o lesitala sinia o le fa’amasinoga pe e le’o iai se fa’ai’uga e fa’amalolo le tumau (suspend) le ua molia e fa’atali se taunu’uga o lona moliaga e pei foi ona faia i isi tagata faigaluega sinia a le Malo e a’afia ini moliaga fa’asolitulafono. Peitai na fa’aalia e le lesitala sinia o le faamasino sili o ia lea e fa’auluulu iai galuega tau fa’amasino ma e leai sona silafia tele iai, i le fa’agaioia o le a vaega.