E ui e manatu le tamaitai tusitala ia Lani Wendt Young o lona faaaogāina o le suafa Telesa e le o se itu ogaoga tele, ae e lei faigofie foi ona taliaina e le faletua ia Telesa Elena Tuataga Blakelock. Na ta‘ua e Lani o le tala na tusia e faatatau lava i se faigauo a tupulaga, ma e leai foi se sootaga ma talatuu a Samoa.
“O Telesa o le tagata autu lea o le tala ma e le o aafia ai nisi o tala mai anamua ma sootaga i nisi o measina a le atunuu, e pei o suafa tāua i aiga i Samoa nei,” o le saunoaga lea a Lani. O le faaaogāina o le igoa Telesa e le o faamamafa faapea o se igoa tāua, o le igoa lava e pei o le igoa o Mele, Sina ma isi.”
Na ia ta‘ua foi, na ia mautinoa lava, e le mafai ona lē oo atu ni faaseā ona o le faaaogā o le igoa Telesa i lana lomiga lea.
“O le tusi lenei ua tusia e faatatau lava i le olaga o tupulaga ua iai i nei vaitaimi ma o le mamafa lava o le tusitusiga e atagia ai le olaga i Samoa nei,” o le saunoaga lea a le tusitala. Na ta‘ua foi e le tamaitai tusitala na iai lava le fuafuaga e talanoa i le aiga e ana le suafa Telesa mo se faamalamalamaga o lea foi itu.
O le faaseā na faaalia i le amataga o le tausaga e le aiga e ana le suafa Telesa ona o le manatu ua lē amanaia e le tusitala le faatāua o loo ave e lo latou aiga i lenei measina. O le suafa o le Feagaiga a Lepea ma o meatotino faaleaganuu a le aiga o sā Telesā, e pei ona ta‘ua ai e le Afioga Telesa Helen Blakelock ua faaee i ai lenei suafa tāua a lona aiga “… e le o se suafa e taatia solo ma pule ai lava soo se tasi i le faaaogāina”.
Na laga foi i le Afioga Telesa Helen le finagalo e ono faaali e le tusitala, o lona faaaogāina o lea suafa ua na o se igoa lava e leai se eseesega ma le suafa Telesa, o le tali a le Afioga Telesa, e tatau la i le tusitala ona faaaogā igoa o le latou aiga.
O le mau a se sui sinia o le Matagaluega o Pisinisi Alamanuia ma Leipa lea e iai lona lala e vaaia mataupu i le faaaogā lea o meatotino a isi aemaise fatuga ma tusitusiga, e tali tutusa ma le mau a le tusitala, e leai se eseesega o le faaaogā o le suafa Telesa ma isi suafa e pei o Sina ma Mele poo Salamasina ae na ta‘ua e se sui o le Ofisa o le Fono na tapa sona finagalo, le Afioga Fuimaono Fereti, e tatau ona silasila lelei tusitala i ia gaioiga auā o suafa nei o suafa tāua ma o measina a aiga ma afioaga.
O le tusi faitau lava ia i lona lomiga lea ua faaigoa ia Telesa e pei ona ta‘ua e le tusitala ua faamatala mai ai se faigauo. Ae o loo iai le vaega o loo ta‘ua ai le Feagaiga e ui o loo faapea mai le tusitala e leai ma se fesootaiga o lana tusi ma talitonuga ua fesootai ai le toatele o le atunuu i le suafa Telesa. O le mau foi a le aiga, o le faaaogā o le suafa Telesa ua mautinoa le toatele o tagatānuu o Samoa ua tosina ai e faatau lea tusi ona o le suafa na faaaogā e lea tamaitai e ui ona o lea e na te lē o talia lea finagalo.
O le aufaitau lava e faia le faaiuga ae o le finagalo o le aiga o le a fesiligia ni finagalo faaletulafono e faatatau i lenei lomiga ona e oo mai lava i le asō e lei iai ma se feiloaiga ua faia ma le tusitala i lenei mataupu. Sa ta‘ua e le tusitala o lana malaga mai lenei o le a taumafai e oo atu i le aiga ma talanoa ai i lenei mataupu.
O le vaega muamua o lenei tusi lea ua faaigoaina o le Telesa, ua mae‘a faalauiloa i le tausaga ua tuanai ae o le vaega lona lua lenei ma o le faaauauga foi lea o le tala lava lenei lea ua faalauiloa foi, ma ua faaigoaina o le “When water burns”.
Faaalia e Wendt-Young e telē se sao o lona alo tamaitai i mafaufauga ma le tuufaatasi ai o lenei tusi ma o se fesoasoani tāua tele e pei ona ta‘ua e le tusitala.
Na faaalia foi le agaga fiafia ma le faagaeetia o le tamaitai i le lagolago atu a le atunuu, e le gata i le lolofi atu e saini ma faatau a latou tusi ae faapea foi le fia talatalanoa i le anoa o le tele o tusitusiga ua mae‘a ona lomia.
“E toatele lava i latou na auai mai ma faailoa mai lo latou fiafia tele i a‘u tusitusiga o le tupulaga aogā aemaise ai foi nisi o mātua. E momoli atu ai la‘u faafetai i le amanaia mai o lo‘u nei tagata faatauvaa.
Ou te fiafia foi e faamanatu atu i le toatele o le fanau aoga e fiafia e faitau tusi, ia faaauau ai pea ma toaga e tusitusi soo se ituaiga tusitusiga.”
O le itu lenei e talitonu Wendt o le auala lea e faaleleia atili ai le tusitusi ma le gagana faitau a le tagata. “E mafai ona e maua mai soo se tusitusiga e te faitau ai nisi o metotia ma mafaufauga e faaupu ai le tele o au tusitusiga.”
E tolu ni tusi a lenei lava tusitala na mafai foi ona faalauiloa ma faatauina i le faletusi o le Samoa Stationery i le Lotemau Centre e aofia ai le Telesa, When Water Burns ma le Pacific Tsunami.
Na ta‘ua ai foi e le tamaitai tusitala le tele o se tomai aemaise ai le fesoasoani atu a se tasi o tuaa (uncle) o lo latou aiga, o ia foi o se tusitala ta‘uta‘ua i Samoa nei i atunuu mamao le tamalii ia Albert Wendt.
Na mafai foi ona asia e Lani le faletusi a le Nelesoni (Nelson Library) i Savalalo i le Aso Lulu ma feiloai atu ai i nisi o fanau aoga mai nisi o aoga aemaise ai lava i latou e fiafia e faaaogā le faletusi mo suesuega faaleaoaoga.