Ua tele tomai eseese e mafai ona a‘oa‘oina e alii ma tamaitai talavou i lenei vaitaimi.
O se avanoa e faafetaia ai foi lenei atunuu o loo tatou aumau ai, ona o polokalame nei a le malo ua faigofie ai ona maua nei tomai aemaise lava i le poto faaonaponei, lea o loo moomia tele i le sailia o galuega.
O le afiafi o le Aso Tofi talu ai, na faamae‘a ai galuega faatino o lenei tausaga a le aoga o le Natcoll Design Technology i le aai o Aukilani.
O le Natcoll e faapitoa i le a‘oa‘oina o tomai tau Graphic Designs, ma e tele vaega eseese o lenei tomai ua faalautele ai i lea aoga. E pei o le mamanuina ma faataatiaina o auivi poo le ata e faatulaga i ai le lolomia o nusipepa, o mekasini, tusi faitau, o faailoilo poo sign a ni kamupani, o le tomai e pue faamatagofie ai ata, o ata video, ma le anoanoai o isi tomai faapena. E lua vasega a le Natcoll na faamae‘a ma faaali ai loa a latou galuega i lea afiafi, mo le maimoaina e aiga ma uo a le au aooga.
E toatele le au aooga na amata mai ai le tausaga, ae foliga e na o le to‘a 26 i latou na faamalolosi lava ma faamae‘a a latou galuegafai, ma maua ai le Diploma i lea polokalame.
O le polokalame atoa na amata mai ia Fepuari o le tausaga nei lava, ma e faamae‘a nei i le aso 7 o Tesema.
E na o le to‘a 3 alo o Samoa o loo aooga ai lenei tausaga, o le tamaitai o , ma alii talavou o Carlo Fono ma Charles Su‘a.
E eseese uma atunuu o le au aooga, e mātele lava i papalagi, Initia ma le au Asia, ma e eseese foi matutua.
E iai se tina ua silia ma le 50 ona tausaga, ae o le tagata laititi e 18 tausaga le matua. E iai foi nisi sa faigaluega muamua, ae ina ua faaletonu galuega ma toe vāea mai, lea na filifili ai e a‘oa‘o lenei tomai auā e tele ina moomia i galuega.
