“O se tulaga sili lea ona faafiafiaina ai ona o le galulue o le atunuu”
O lea ua lata ina atoa le 12 masina talu ona mavae atu le afā malosi o Eveni i le masina o Tesema o le tausaga ua mavae 2012, ae ua molimauina le toe vave mau o le Upolu i taumafa. O le mea mautinoa e lei nofoai lo tatou atunuu aemaise lava le aufaifaatoaga o loo galueaina le laueleele ona sa vave ona toe suo tosina le fanua ma faamamā le vao ae toe vave faato‘a i laau tau faatoaga.
O le faaaliga a le aufaifaatoaga ma le aufaifaiva i Upolu na faagasolo i le vaiaso ua mavae sa molimauina ai ni vaaiga matagofie i le fua mai o faatoaga i soo se laau, ae faapea foi i lafu manu e pei o povi, mamoe, puaa ma moa. Na saunoa le Minisita o Faatoaga ma Faiga faiva le afioga Le Mamea Ropati ma ia faailoa taumafaiga a le Malo e unaia pea le aufaifaatoaga ma ave i ai fesoasoani.
O le faanaunauga o le Malo ia faateleina taumafa mo le atunuu. O Upolu lava ia sa pito mafatia i le afā malosi o Eveni sa faaleagaina ai togafa‘i, maumaga, ma isi laau totō peitai o vaaiga i le faaaliga ua mae‘a na iloa ai, le vave ona toe manuia taumafaiga a le aufaifaatoaga.
A fua i le tuanai o le afā ia Tesema 2012 sa lē toe vaaia ni esi ma isi fualaau suamalie, e oo i le koko na faaleagaina aemaise o togafa‘i ma taamu. O fua aliali o le alofagia o Samoa e le Atua i le tuanai o lea mala faalenatura na molimauina i le tele o le talo ua toe maua, ma isi laau tau faatoaga.
O le talo lava ia i se molimau faamaoni e lē o toe oge ai le eleele o Samoa. O uta o le talo o loo ave atu i Amerika ma Niu Sila ua faasolosolo manuia ma o isi ia tupe lelei mo le aufaifaatoaga ae manuia ai foi ma le tamaoaiga o le atunuu.
O le faaiuga o le vaiaso ua mavae atu nei na faalauiloa mai ai se fesoasoani a le faletupe o le lalolagi e tusa ma le 25 miliona tupe Amerika, e tusa ma le silia i le lima sefulu miliona tala Samoa. O se vaega tele o lea feasoasoani o le a masaa i le aufaifaatoaga ma le aufaifaiva e toe faaleleia ai a latou atinae sa mafua ona faaletonu ona o le ogaoga o sauaga a le afā o Eveni. Tasi lea o fesoasoani o le a toe manuia ai le aufaifaatoaga ma le aufaifaiva ma o le itu mautinoa o le manuia ai foi lea o le atinae o le tamaoaiga o le atunuu.
O le mae‘a o le faaaliga a le aufaifaatoaga ma le aufaifaiva i Upolu na tufatufa ai faailoga tupe mo le aufaifaatoaga ma faifaiva ua faamanuiaina a latou taumafaiga. O le agaga autū o le Malo ia faaosofia le olaga galue o le atunuu aemaise o le autū o lenei tausaga o tupulaga talavou o Samoa ia maua le lagona fiafia e atinae faatoaga ma faiga faiva.
O le mau a le Malo, a lē manuia mai le aoga i se galuega faaofisa poo isi tomai, ae o loo lelei i le faato‘aina o le laueeleele ma fagota le gataifale auā o tupe uma lava e maua ai.
